Ururka wadaniga ah ee UDHIS ayaa shaaca ka qaaday in
xukuumadda Rayaale is hortaagtay isla markaana diiday
dhexdhexaadin uu ururkoodu doonayey inuu isu soo
horfadhiiyo wada-hadal dhinacyada siyaasada ee khilaafka
ba’ani u dhexeeyo, waxaanu dhinaca kale sheegay in ay
xukuumaddu ay abaabulayso shir ay iyadu maamulayso soona
xulatay xubnaha hogaaminaya.
Hadaba Ibraahim Cabdilaahi Xuseen (Dhago weyne) oo ka mid
ah hoggaamiyayaasha ururka Dimuqraadiyada iyo horumarinta
ee isbedel doonka Somaliland (UDHIS) oo warsaxaafadeed uu
ku saxeexan yahay shalay ka soo saaray magaalada Hargeysa
ayaa si adag u cambaareeyey falkii ay ciidanka bileysku
6-dii April Rasaasta ugu fureen hogaamiyaha iyo
Taageerayaasha Kulmiye, iyo sidoo kale go’aankii ay
komishanka doorashooyinku ku cayimeen wakhtiga doorashada,
isla markaana ay ku saleeyeen go’aankii muddo kordhinta ee
Guurtida, talaabooyinkaas oo ay sheegeen inay dabka ku sii
huriyeen khilaafkii siyaasadeed ee taagnaa.
Warsaxaafadeedyo Dhamaystiran ayaa ururka udhis ka soo
saareen Arimaha Mudo kordhinta ee guurtida ay Wakhtiga u
kordhisay Madaxweyne Daahir Riyaale kaahin iyo ku
xigeenkiisa Axmed yuusuf Yasiin.
Gogol-fidintaasi, iyada oo UDHIS ay qanaacaad buuxa ku
qabto waddada ay Somaliland ku caana maashay oo ah
wadahadal iyo wada-tashi, in lagaga gudbo wixii caqabado
inaga horyimaadda iyo iyada oo UDHIS aaminsan inay tahay
dhex-dhexaad aan dhinacna u janjeedhin, waxa kaliya ee ay
danaynaysaana tahay Maslaxadda Ummadda, waxa kale oo UDHIS
ay marti-qaaday Odayaal iyo Aqoonyahanno reer Somaliland
ah, kana mid yihiin Abwaanada Maxamed Ibraahin Warsame (Hadraawi),
Maxamed Xaashi Dhamac (Gaariye) iyo rag kale oo magac ku
leh somaliland oo ay xitaa ka mid yihin masuliyin horay
uga tirsanaan jirtay Maamuladdii hore ee ka arrimin jiray
somaliland.
Isku soo wadda duuboo Masuuliiyiin ka tirsan Maamulka
Somaliland ayaa sheegay inanay Aqoon sanayn Xisbigan
Wadaniga ah ee udhis iyadoo marka taasi laga yimaado uu
jiro muran xaga xisbiyadda ah oo udhexeya xukuumadda iyo
Xisbiga Kulmiye iyadoo ay jireen mudaharaadyo Nabadeed oo
ay ku dhawaaqeen Saraakiisha kulmiye ka gadaal mudo
kordhintii loo sameyay Madaxweyne Riyaale iyo ku
xigeenkisa Axmed yuusuf Yaasiin.
Cabdirashiid Maxamed Daahir
