|
Afeef inaan ka dhawo baan
rabaa, ruuxa aan ahaye
Ulajeeddadaydaan rabaa,
inaan iftiinshaaye
Afjig baan u dirayaa
akhriye, male-awaalkiise
Ma aan ahi abwaan lagu
yaqaan, maanso unuggeede
Mana ahi aqoonyahan ma'wiya,
aadmi kuunyado e
Mana ahi buxuur Aw, cilmiga
ugu majeertaane
Adduunyada in dooraan
jiriyo, odayka-sheekeeye
Waxaan ahay miskiin Eebbe
raba, inuu ammaanaaye
In yar baan rabaa inaan ka
dhaw, shayga uu yahaye
Arji baan u qorayaa
dhibbane, ulashadiisiiye
Arrimahan murgaan doonayaa,
inaan ergeeyaaye
Iimahayga badan baan rabaa,
inaan u muujaaye
Ajar baan rabaa inaan ku
heli, aayatiin wacane
Inta kalena waxaan doonayaa,
inaan ogaataaye
Istaaqfurulla Eebbow
haddaan, erey gef kaa sheego
Adigaan cidina kuu ekeyn,
kuna abbaarayne
Astaan gaara adigaan lahayn,
uunku shaabaho e
Amarkaaga adigaan cid kale,
oolin karahayne
Kax abaara adigaa ka dhiga,
meel ugbaad badane
Aafooyin adigaa ku rida,
ilo barwaaqaade
Addoonkii ku caasiya adaan,
eex ka galehayne
Abtirsiino adigaan lahayn,
lagu arooraaye
Uur hooyo adigaan ka iman,
aabbe guursadaye
Ayaandaranta adigaa yaqaan,
goorta ay tahaye
Allaahu Akbar Eebbow adaan, Axad u baahnayne
@@@@@@@@@@@@@@@
Adigaa anfaca qaybiyoo,
siiya aadmiga e
Addin wixii ku adeegtiyo
wixii, uurka ku xammaarta
Shimmbir samada aadiyo,
kulluun iran biyood jooga
Irsiq waxay cunaan baad
taqaan, una astaysaaye
Abqo kulay ku tahay way
heshaa, cidiba eefkeede
Allaahu Akbar Eebbow adaan, Axad u baahnayne
@@@@@@@@@@@@@@@
Sac irmaana, aalada lo'aad
araxdu weynaatay
Igar madiya, abeer geel,
ilmaha loo tukubinaayo
Orgi sooca iyo wanan ahmina
suuqa laga iibsho
Ashkir faras ah iyo awr
hayina, aalad lagu guuro
Uluuf lacag ah, aqal daar
ahoo, agabka loo buuxshay
Ilwaad-quruxsan, oorida
haween, ayni gabar joogta
Il durdura, tigaado isku
baxay, oollin iyo raaxo
Dhul ammaan ah, oo aannay
jirin aano iyo duudsi
Askar geyfan, gaashaandhig
adag, maammulka ilaasha
Hub olola, diyaarado onkoda,
urur madaafiic ah
Ubad iyo walaal iyo adaan
ehel u baahnayne
Allaahu Akbar Eebbow adaan, Axad u baahnayne
@@@@@@@@@@@@@@@
Qoraxdii aroortii baxdeen,
ka ambanayn dawga
Mugdigaa eryanayee intaa,
aashi dabajooga
Dayaxaa allaylkii gudee,
ayda miranaaya
Xiddigaha agaasiman cirkee,
iinta laga dhawray
Buuraha aloosane, dhidbane,
udubka loo taagay
Badda uuradaha kicinaysee,
caro la uugaami
Intaasoo layaabaad dhistaa,
ama abuurtaaye
Allaahu Akbar Eebbow adaan, Axad u baahnayne
@@@@@@@@@@@@@@@
Cunug uur ku jira aayihii,
wuxuu ahaanaayo
Ifka intuu ku noolaanayee,
ku intifaacaayo
Awlaad intuu dhalahayee, ka
iman duudkiisa
Arsaaq wuxuu afkaa
gelinayee, looxa ugu yaalla
Ajashiisu meeshay tahuu, ku
intihoonaayo
Iblays inuu kaxaystiyo inuu,
weli ahaanaayo
Asraarteeda adigaan cid
kale, kula ogsoonayne
Allaahu Akbar Eebbow adaan, Axad u baahnayne
@@@@@@@@@@@@@@@
Ooddin iyo xanuun iyo adaan,
eel ku qabanayne
Arwaax dhimata adigaan
lahayn, laguna aasayne
Iilkii adaan lagu dhigayn,
agab la'aaneede
jid-siraad adaan lagu
eryeyn, edge ciriiryoone
Imtixaan adaan lagu tusayn,
maalin aakhiro e
Eed ku qabatay adigaa ku
mudan, ololki naareede
Abaalmarinna adigaan ku
helin, ficil ixsaaneede
Allaahu Akbar Eebbow adaan, Axad u baahnayne
@@@@@@@@@@@@@@@
Adigaa arlaa'iga ka dhigay,
guri ardaa weyne
Reer Aadan adigaa xukumay,
inay u guuraane
Shaydaanna adigaa aqbalay,
inuu ilduufshaaye
Adaa qoray Injiil iyo
Furqaan, amase Tawraade
Axkaamtiyo shareecda, adaa
faray, adeecoode
Rusushiina adigaa u diray,
inay iftiinshaane
Ka irdhooba adigaa ku ridi,
naar abaadiya e
Albaabkii jannaad adow
ballaqi, kii kiu aaminaye
Allaahu Akbar Eebbow adaan, Axad u baahnayne
@@@@@@@@@@@@@@@
Adigaa adduunyada dhisoo,
soo abaabulaye
Askunkeeda adigaa leh iyo,
udub-dhiggeediiye
Siday tahayna adigaa u
galay, oogo iyo hoose
mulkigeeda adigaa leh iyo,
agab wixii yaalle
In ayaamo ay jiri naflena,
ku intifaacaayo
Suurkii in la afuufayoon,
cidina oolaynin
Oo aad burburin jeer
cayiman, idil ahaanteedba
Agaraadam ay noqon adaa,
sugay ammuurtaase
Allaahu Akbar Eebbow adaan, Axad u baahnayne
@@@@@@@@@@@@@@@
Reer Nuuxii Ilaah caasiyee,
aayadaha beenshay
Nimankii dhegaha awtayee,
Nabiga eedeeyey
Ee yiri akhyaar ma aha iyo,
oday karaamaysan
Caadkii Ilaah caasiyee,
aayadaha beenshay
Namankii asnaamtay dhaxleen,
keli addeecaayey
Awliyo-Alle nimankii ka
dhigay, kuman ardaaliin ah
Thamuudkii Ilaah caasiyee,
aayadaha beenshay
Idinbacatha diidaye, arlada
kula heshiin waayey
Amley xiirta nimankii
boqnaha aayar kaga gooyey
Reer Luudii Ilaah caasiyee,
aayadaha beenshay
Nimankii anshaxa meel
dhigtee, caado ugub keenay
Afadooda nimankii nacee,
wiilasha orgeeyey
Fircoonkii Ilaah caasiyee,
Eebbenimo sheegtay
Ee yiri anaa webiga Niil,
amarka siinaaya
Nimankii unuunyada ka jaray,
ubadka reerkooda
Intaasoo jabbaariin ahoo,
dunida aafeeyey
Ibtilooyin adigaa ku riday,
qolaba aadkeede
Oo aayatiinkood ka dhigay,
ehel cadaabeede
Allaahu Akbar Eebbow adaan, Axad u baahnayne
@@@@@@@@@@@@@@@
Aamiinta adigaa aqbala,
duco Islaameede
Mid la oofsho Eebbow ka
yeel, amarka diintaada
Ilays baxaya Eebbow ka yeel,
uumiyuhu raaco
Aayaadka Eebbow u yeel,
maqal ajiibaaya
Axaadiista Eebbow u yeel
aragti dhuuxaysa
Ingiriiska Eebbow ka goo,
wuxuu Islaam yeelay
Amrikaanka Eebbow u diid,
amarkutaaglaynta
Orobbada habowsane qalbiga,
aabur laga saaray
Asal-raaca nimankaa u qaba
belo la ugaanshay
Adyaddooda Eebbow ku u yeel
duulal ka adkaada
Yuhuuddaa ilmaha laynaysee,
ooriyada dooxi
Ummaddoo dhan nimankaa ku
tuman, ab iyo wiillkiisa
Ee yiri anaa door ahoo,
aradkan lay uumay
Eebbow ijxaadkiyo, ku jebi,
aabigiyo maagga
Muslimiinta Eebbow ka yeel,
ul iyo diirkeeda
Israacooda Eebbow ka yeel,
midow islaax keena
Uurkooda Eebbow ka mayr,
aramidaa jiifta
Amiirkooda Eebbow ka yeel,
Culimo loo aayo
Aqoon garata Eebbow u yeel,
dabinka loo aassay
Awood burisa Eebbow u yeel
anafadii gaalka
Intii dhimatay Eebbow ka
yeel ehelu-khayrkaaga
Inta noolna Eebbow ku beer,
xaqa udoodkiisa
Allaahu Akbar Eebbow adaan, Axad u baahnayne
|
