|
Aqoonyahan Jamaal X. Cali Cilmi ayaa soo dhaweeyay
geeddi-socodka iyo tallaabooyinka ay qaadeen Guddiga
xaqiiqo raadinta arrimaha Dhulbahante.
(Edmonton, Sep 10, 2011
Ceegaag Online)
“Waxaan soo dhawaynayaa tallaabooyinka
ay qaadeen guddiga xaqiiqa raadinta Dhulbahante iyadoo in
badan laga dhaga adaygay tubta kaliya ee Dhulbahante ku
midoobikaraa in ay tahay iyadoo si dhab ah looga wada hadlo
arrimaha wiiqay midnimada iyo horumarka beelwaynta
Dhulbahante cid walba oo ay khusaysana lagala hadlo hadduu
joogo Soomaaliland iyo hadduu joogo Puntland.”. ayuu yidhi
Jamaal x. cali oo ka mid ah aqoonyahannada beesha
Dhulbahante ee ku nool qurbaha.
“Waxaa hubaal ah in la soo gaadhay
xilli Dhulbahante meel walba oo uu joogo garwaaqsaday in
shakhsi ama qabiil gaar ahi aanu maroorsan karin talada
Dhulbahante meeshii uu doonana ku dari Karin”.Mar aan wax ka
waydiinay ujeeddada loo qabanayo shirka gudaha Soomaaliya ka
dhacaya ee Dhulbahante ayaa waxa uu ku jawaabay “shirkan la
doonayo in la qabto waa shir wadatashi ah waxna layska
waydiinayo dhibaatada beesha haysata, balse maaha aniga
ogaalkay shir lagu dhisayo maamul gaar ah oo beeshu yeelato”
Jamaal Xaaji Cali ayaa sheegay in uu
aaminsanyahay in shirguddoonka shirka laga ilaaliyo madaxda
dhaqanka ee Dhulbahante maaddaama ay shirarkii hore ee
fashilmay ay gadhwadeen ka ahaayeen islamarkaana ay
wakhtigan xaadirka ah ku kala aragti duwanyihiin shirkan
lagu wado in uu ka dhaco carro Dhulbahante.. “waxaan
aaminsanahay in shirguddoonka shirkan loo daayo
aqoonyahannada iyo siyaasiyiinta hadda gacanta ku haya
islamarkaana lagu ixtiraamo meesha ay u qoondeeyaan in
gogosha shirka la dhigo ka dib marka ay soo gabagabeeyaan
guddiga xaqiiqa raadintu socdaalkooda. “madaxda dhaqanku
ducada furitaanka iyo ducada xidhitaanka shirka ayay
leeyihiin sidaasaa iyagana u eed yar, shirkana u wanaagsan
ayuu sii raaciyay Jamaal hadalkiisii.
Jamaal ayaa uga digay guddiyada
qabanqaabinaya shirka in aysan ku faragalin beelaha
Dhulbahante ergooyinka shirka uga qaybgalaya, haddii ay
qurbajoogta tahay iyo haddii ay gudaha dalka tahayba sidii
horay u dhici jirtay, taas oo saldhig u ah in aan lagu
najixin shirarkii hore ee dhabar-taabashada ahaa.
Ugu danbayntii Jamaal ayaa sheegay in
uu aaminsanyahay in sida kaliya ee lagaga bixikaro khilaafka
dhulbahante ku dhexjira ay tahay iyadoo laysu tanaasulo
wixii lakala tabanayana si caddaalad ah loo lafaguro.
www.ceegaag.com
webmaster@ceegaag.com
|
