Ra’iisal Wasaare Nuur Cadde oo saacadaha soo socda ku dhawaaqi doono Xukuumad ka kooban 18 Wasiir.

(Baydhabo, January 01, 2008 Ceegaag Online)

Ra'iisul Wasaaraha Soomaaliya Nuur Xasan Xuseen (Nuur Cadde) ayaa lagu wadaa in saacadaha soo socda uu ku dhawaaqo Xukuumadiisa cusub ee tirada yar.

Sida ay sheegayaan wararka laga helayo Magaalada Baydhabo ee Xarunta Dowladda Soomaaliya Nuur Cadde ayaa la filayaa uu shaaciyo Gole Wasiiro oo sida la sheegay ka kooban 18 Wasiir.

Madaxda Dowladda Federaalka oo ku wada sugan Magaalada Baydhabo ayaa xalay kulan gaar ah ka yeeshay magacaabida Xukuumada Soomaaliya

Ra’iisul Wasaare Nuur Cadde waxa uu damacsan yahay inuu u xaqiijiyo beesha Caalamka iyo Soomaalidaba in uu garwaaqsaday in dhismaha Gole Wasiiro oo ka kooban 18 Wasiir, taasoo aad u adag sida Beelaha ugu qanci karaan, bacdamaa Xukuumadihii tira badnaanta ahaa uu is qab qabsi ka jiray, hadana waxaa suura gal aheyn sida loogu heshiin karo Xukuumadan tirada yar ee la soo dhisayo.

Qaabka loo kala heli doono Golaha Wasiirada oo lagu saleeyay nidaamka 4.5 ee awood qeybsiga Beelaha ayaa waxay noqon doontaa mid beelaha waa weyn ay u kala heli doonaan min Afar Wasiir, halka Beesha 5aad ay heli doonto min labo Wasiir oo kaliya.

Wararka ilaa iyo haatan laga helayo Gobolka Baay ayaa sheegaya in ay socoto qaban qaabadii ugu dambeysay ee lagu soo dhisayo Xukuumada Cusub oo sida muuqata ku dhawaaqitaankeeda lala sugayay Madaxweynaha Somalia Mudane C/llaahi Yuusuf oo shalay Baydhabo soo gaaray.

www.ceegaag.com

webmaster@ceegaag.com