|
Xubnaha
Baarlamaanka oo buuq iyo sawaxan ku dhageystay Khudbooyinkii
ay jeedinayeen Madaxweynaha iyo Ra'iisal Wasaarihiisa.
(Baydhabo,
Aug 28,
2008 Ceegaag Online)
Xubnaha
Baarlamaanka Soomaaliya oo maanta shir ku yeeshay Xarunta
ADC-da ee magaalada Baydhabo ayaa waxay buuq iyo sawaxan ku
soo dhaweeyeen madaxda sare ee Dowladda Federaalka, kuwaasi
oo Baarlamaanka u hor-tegay in ay u jeediyaan khudbooyin ku
saabsan heshiis ay ku soo gaareen Dalka Itoobiya kadib
markii muddo wada hadal uga socday Magaalada Addis ababa ee
dalka Itoobiya
Xildhibaannada Baarlamaanka oo beryahan uu u dhaxeeyay muran
salka ku hayay khilaafka ay ka heshiiyeen madaxda sare ee
Dowladda ayaa markii uu furmay kulankii Baarlamaanka waxay
bilaabeen buuq iyo sawaxan, kaasi oo keenay in
nidaamiyayaasha Baarlamaanka ay ku guuleysan waayaan in ay
ajendayaasha kulanka jeediyaan.
Guddoomiyaha Baarlamaanka Sheekh Aadan Madoobe oo markii
qaylada badatay hadalka la wareegay ayaa waxaa uu ku yiri
Xildhibaanada in ay u codeeyaan in la dhegeysto khudbooyinka
Madaxweynaha iyo Ra'iisal Wasaaraha iyo in aan la dhegeysan
oo ay iska fasaxaan, kadibna waxay 130 mudane oo ka mid ahaa
220 mudane oo kulankii maanta ka soo xaadirtay ay u
codeeyeen in la dhegeysto khudbooyinka madaxda sare ee
Dowladda, halka ay 90 Xildhibaan diideen in la dhegeysto.
Ra'iisal
Wasaaraha Xukuumadda Federaalka Nuur Xasan Xuseen (Nuur
Cadde) ayaa lagu bilaabay dhageysiga khudbooyinka ay soo
jeedinayeen Madaxda Dowladda.
Ra'iisal
Wasaaraha waxaa uu Mudanayaasha Baarlamaanka u sheegay in ay
madaxda Dowladda ka heshiiyeen khilaafkii u dhaxeeyay, isla
markaana ay ku heshiiyeen qodobadan hoos ku xusan:
1. In ay
abuuraan jawi is-afgarad iyo is-aaminsanaan Madaxda Dowladda
iyo Hay'adaha Dastuuriga ah ee dalka.
2. In
Axdiga Federaalka KMG ah uu yahay Sharciga ugu sareeya dalka
, loona hoggaansanaado.
3. In
madaxda dowladda ay xilkooda u gutaan si waafaqsan Axdiga
Dalka, isla markaana aysan madaxda dowladda isku faragelin
howl-maalmeedkooda.
4. In
madaxda Dowladda ay howlahooda u gutaan qaab wada-tashi ah.
5. In
Wasiirrada Xukuumadda Federaalka la gaarsiiyo 23 Wasiir si
loo xaliyo qul-qulatooyinka ka dhex jira Barlamaanka.
6. In
Wasiirradii Xukuumadda ku jiray Khilaafka ka hor ee 15-ka
Wasiir ahaa ay howshooda sidooda u sii wataan.
7. In
madaxweynaha iyo Ra'iisal Wasaaraha ay isku af-garteen in
shaqada laga fariisiyo Hoggaanka sare ee maamulka Gobolka
Banaadir, isla markaana ay isla magacaabaan guddi u
xil-saaran soo dhisidda Maamulka Gobolka Banaadir 15 cisho
gudahood.
8. In la
taageero dib u heshiisiinta ay Dowladda kula jirto
mucaaradka ka soo horjeeda iyo qodobo kale oo ku saabsan
maareynta dhaqaalaha Dowladda soo gala iyo Amniga.
Intaas kadib waxaa cod baahiyaha lagu soo dhaweeyay oo
Mudanayaasha Baarlamaanka la hadlay Madaxweyne C/llaahi
Yuusuf Axmed oo intii uusan qudbadiisa bilaabin
Xildhibaannada oo buuqayay ka dalbaday in ay kala doortaan
in uu la hadlo oo ay dhegeystaan iyo in uu iska baxo,
kadibna ay Xildhibaannada badankood isku raaceen in ay
dhegeystaan khudbada madaxweynaha.
“Halkan isuma soo taagin in
aan hadal badan idiin sheego, heshiiskii waxaa idiin aqriyay
Ra'iisal Wasaaraha, waxaanse idiin sheegayaa hadal yar oo
nuxur leh, wuxuuna yahay in heshiiska aan gaarnay uu yahay
mid ay ku jirto maslaxada Dowladda Federaalka Soomaaliya
waayo Beesha Caalamka iyo Mas'uuliyiinta Dowladaha aan
saaxiibada nahay ee na taageera waxay nagu yiraahdeen haddii
aadan heshiis gaarina nagu tashan meysaan, marka waxay ila
tahay in ay habooneyd in aan heshiiskan gaarno”ayuu yiri
Madaxweyne C/llaahi Yuusuf.
www.ceegaag.com
webmaster@ceegaag.com |
