Soodhaweyntii Musharax Suleiman Maxamed Samatar (WajixaadO ee Minnesota.

(Minneapolis Minnesota, Aug 25,  2008 Ceegaag Online)

Xaflad si qurux badan loo soo agaasimay ayaa waxa ay ka dhacday magaalada Minneapolis ee gobalka Minnesota. Xafladaas oo lagu soo dhaweeyey Musharax Suliebaan Maxamed Samatar (Wajixaad), oo u sharaxan jagada madaxweynenimada Puntland

Musharaxan ayaa waxa uu degan yahay gobalka North Carolina ee wadanka Maraykanka mudo ka badan labaatan sano, halkaas oo uu wax ku bartay, kuna dhamaystay aqoonta sare. Musharaxan ayaa waxa uu ku maqnaa wadankii in ku dhow sanad, halkaas oo uu kaga qayb galay shirkii dibu heshiisiinta beelaha Soomaaliyeed ee ka dhacay Magaalada Muqdishu sanadkii la soo dhaafay. Shirkaas oo uu kaga qayb galay isagoo matalayey waftigii ka yimid maraykanka .

Musharax Saleebaan, ayaa markii uu shirka dhamaystay u gudbay Puntland oo kaga qayb galay shirkii ka dhacay Boocame3 ee ku magac dheeraa Badbaado. Intii uu shirkaas joogay ayaa waxa loo doortay xoghayn, halkaas oo uu shirkii ku dhamaystey guul.

Musharax Suliebaan, ayaa intii uu joogay Puntland, waxa uu dareemay in ay jirto maamul xumo baahsan oo ku salaysan cadaalad daro, iyo waxqabad la’aan. Isagoo markaas go’aansaday in uu u istaago sidi uu wax uga bedeli lahaa dhibtan ku habsatay shacabka Puntland eek u dhaqan wadankii. Halkaas oo uu markuu ku soo noqday Maraykanaka uu bilaabay olole wayn oo ku wacyi galinayo dadka u dhashay Putntland ee ku nool qurbaha.

Intii uu iman Minnesota, ayaa musharaxan waxa uu soo maray Gobolka Ohio oo uu kula kulmay Jaaliyada reer Puntland ee degan gobalkaas. Musharax Saleebaan, ayaa qudabdiisii uu kula hadlayey reer Minnesota  ku soo bandhigay baahida Puntland ka jirta oo ah maamul xumo iyo cadaalad la’aan. Isagoo dadkii shirka isugu yimid ku beeray qiiro iyo argagax, ka dib markii uu ka hadlay waxyaalo badan oo ku salaysan qabsashadii Laascaanood iyo siyaasad xumida maamulka hada ka arimiya Puntland.

Ugu dambayntii ayaa musharaxa la weydiiyey su’aalo aad u qoto dheer oo ku saabsan doorashada Puntland iyo sidii loo xoreyn lahaa Laascaanood. Musharaxan ayaa balan qaaday, hadii uu xilka qabto in uu gacanta ku soo celin doono Laascaanood iyo dhulka kale ee maqan, isagoo ku soo celin doono Puntland nabad, la dagaalami doono budhcad badeeda jira, sicir bararka, ku dhaqi doona sharci ku salaysan cadaalad, iyo in uu abuuri doono ilo dhaqaalo.

Fadlan halkan ka Daawo Sawiraddii shirka oo dhan:  www.insideminnesota.org/images.html  

Abdimalik Askar

aabdimalik@hotmail.com

webmaster@ceegaag.com