Nolol Caynkee ah ayuu ku Nool yahay Senator Obama walaalkii George Xuseen Onyango Obama.

(Nairobi, Aug 23,  2008 Ceegaag Online)

George Xuseen Onyango Obama  oo ah nin ay aabo wadaagaan  ama xaga aabo ay ka walaalo yihiin Senatorka u sharaxan xisbiga dimoqraadiga ee dalka maraykanka, Barack Obama, ayaa la sheegay in uu ku nool yahay nolol adag sida ay qortay jariidada Vanity Fair qeybteeda  afka talyaaniga ku baxda  ee kasoo baxda dalka maraykanka.

Sida ay jariidadu qortay waxa ay tidhi “George Xuseen Onyango Obama  waxa uu degan yahay xaafad carshaan(buulal) ah, taas oo ku taal nawaaxiga magaalada Nairobi ee dalka Kenya. Waxa uuna ku nool yahay mudul ka mid ah cariishyada xaafadaa ”

Mr. George Xuseen Onyango Obama  oo ah ninka ugu da’da yar caruurta uu dhalay Barack Xuseen Obama  ayaa markii ugu horesay kahadlay nolosha adeg ee uu ku jiro taas oo aad uga duwan tan uu ku jiro walaalkiisa xaga aabo ee Barack Obama. Mar uu jariidada u tilmaamay nolosha adeg  ee haysata, Mr George waxa uu yidhi “Cid I taqaana ama og waxaan ahay anigu majirto” isaga oo intaa ku daray”wax aan ku noolahay ama aan helaa bishii wax ka yar Hal Dollar.”

Mr. George Xuseen Onyango Obama, oo ay ka muuqato wajigiisa rafaad,isla markaana gacmihiisa kasoo laalaadiyey labada cidhif ee tiirka ah ee kadinka cariishkiisa, albaab loox dhamaaday ka samaysan oo leh muunad cagaaran na uu ka danbeeyo, ayaa wargeyska u sheegay inuu u noolyahay sida cidlo jooga(duur-galeen) cid ogna aysan jirin isagoo intaa raaciyey “ Marka qof wax ka sheego magaca Awoowgey, waxaan ugu jawaabaa waxba iskuma nihin Barack, aad ayaana  uga xumahaya nolosha aan ku jiro.”

Nolosha uu ku jiro Mr George waxay aad uga duwan tahay ta uu ku noolyahay Senator Barack Obama oo ah Senator Maraykan ah oo u tartamaya doorashada madaxtinimada dalkaas ee dhaceysa bisha November sanadkan una sharaxan xisbiga Demoqraadiga kaas oo kasbaday dakhli ka badan  4,000,000(afar malyan) oo Dollar sanadkii aynu soo dhaafnay ee 2007, sida ay tabiyeen shaashadaha la iska arko ee dalka Maraykanka.

Mar uu Mr. George ka waramay kullankii dhex maray isaga iyo Barack Obama sanadkii 2006 wuxuu sheegay inuu ahaa mid kooban ayna wada sheekaysteen isaga iyo Barack daqiiqado aad u yar oo kooban, isagoo intaa ku daray “Wuxuu ila ahaa kulanka aan la kulmay Barack sida anigoo la kulmay qof qalaad.” Halka Senator Barack Obama uu ku magacaabay Mr George inuu ahaa “Wiil qurxoon oo maddax wareegsan” mar uu Senatorku tilmaan kabixinayey Mr George,hadalkaas oo ku qoran buugiisa lagu magcaabo “Dreams from my father.”

Arintan ay jariidadu qortay ayaa kusoo beegmeysa mar bishan aynu ku jirno horaanteeedii la daabacay buug uu qoray qoraa taabacsan xisbiga muxaafadka garabka midig(Republican) ee dalka maraykanka, buugaas oo lagu magacaabo “the Obama nation …” kaas oo uu qoraagu ku andacooday  in Senator Obama sheegan karo dhalashada kenya taas oo uu Senatorku been -abuur ku tilmaamay. Balse jariidadu waxaa ay cadeyneysaa heerka ay fikirka anaaninimadu ka gaarsiisan tahay siyaasiyiinta Maraykanka.

Siciid Mohamed X. Cali

Boston, USA

webmaster@ceegaag.com