Baaq furan oo ku socda Maxaakiimta qabsatay Magaalada Kismaayo iyo shacabka Deegaankaas.

(Denmark, Aug 28,  2008 Ceegaag Online)

Asalaamu Caleykum.

Salaanta Islaamka ka dib:

Isbeddelkii ugu dambeeyay ee Kismaayo wuxuu ahaa mid lagu diirsaday marka laga eego aragtida iyo dareenka qofka muslimka ah ee ay damqayso xaaladda Kismayo iyo waayihii ay soo martay. Ulama jeedo sida dadka qaarkiis inaan ku faraxsanahay oo keliya ka saaristii Col. Barre iyo malleeshiyadiisii ee ujeedku waxa weeye in Kismaayo ay u gacan gasho dad xambaarsan farriin ka duwan tii ay wadeen kooxihii horay gacanta ugu hayay oo dhan.

Waxan shaki ku  jirin in dadka Jubbada  Hoose ay xadgudub iyo dhibaato joogto ah kala kulmeen kooxihii isku haystay gacan ku haynta gobolka ha noqdeen kuwa haatan laga saaray ama kuwii horay uu loollanka ugula jiray ee beelaha  kale  ka soo jeeday, laakiin hadda waxaa muuqata isla markaasna raja wanaagsan laga qabaa in kooxda gacanta ku dhigtay gobolkaas ay aragti ahaan si wayn uga  duwan yihiin kooxihii horay ugu loollamayay.

Muqaawamada Kismayo waxa laga sugayaa inay gobolka ka sifeeyaan aragtida ku dhisan qabiilka iyo jabhadaynta ee ay ku beereen muddadii dheereyd ee ay gacanta ugu jirtay kooxaha aragtidoodu ku dhisan tahay beeleysiga iyo sadbursiga anigoon kala soocin dhammaantood. Taas  waxaa  dheer in gobolka si buuxda  looga hirgeliyo ku dhaqanka shareecada Islaamka  iyo cadaalad ay dadkoo dhami u siman yihiin.

Gobolku wuxuu u baahan yahay midaynta dadwaynaha ka soo jeeda beelaha kala duwan ee muddada dheer la isku dilayay iyadoo magacyo beeleed iyo kuwo jabhadeed la adeegsanayo, taas  waxay suuragal ku noqon kartaa oo keliya cadaalad muuqata iyo maamul ku dhisan Shareecadda Islaamka oo gobolka lagu soo dabaalo.

Si loo gaaro ujeeddada laga lahaa isbeddelka socda waxaa  lagama maarmaan ah in waxgaradka iyo dadka wax ku oolka ah ee gobolka ay qayb ku yeeshaan dhaqangelinta hadafka loo socdo oo ah in ALLAH la raalligeliyo ka dibna dadwaynaha gobolka loo oggolaado inay helaan fursad ay danahooda adduun iyo aakhiro ku hagaaji karayaan.

Arrinta Kismaayo iyo Soomaaliya oo dhami maaha  mid  ay koox iyo jabhad gaar ah ku talaxumaan karayaan ama ay ka gaari karaan xal guul haddii aan loo kaashan ALLAH ka  dibna mujtamaca  intiisa  kale, sidaa awgeed midnimada qaybaha iyo aragtiyada muqaawamadu waxay ila tahay arrin aan marna  laga maarmi karin.

Taas waxan ula jeedaa in Muqaawamadu ay ka fogaato khilaaf dhexdeeda ah iyo xukun maroorsi ama taakulayn aragti qabiil gaar ah ama in awoodda muqaawamadu ay noqoto mid  u rahman ama  ka shidaal qaadata aragtida beelaha gobolka horay ugu hardami jiray ee weli ay dhextaallo aanada iyo eelka ay dhigeen qabqablayaashii horay gobolka uga  talin jiray.

Dhiigga muslimku waa mid dhowrsoon oo aan  lagu bannaysan karin si  fudud, qof kastana ha ogaado in isagoo keligiis ah laga xisaabi doono wixii uu galay oo aan laga aqbali doonin koox hebel ayaan ka tirsanaa iyo hebel ayaa ii diray inaan hebel dilo, waxaa  lagu waydiin doonaa ''maxaad adigoo hebel ah u daadisay dhiigga hebel'' .

Haddii laga  fursan waayo waxay ila tahay in dhinacyada Muqaawamadu ay ku heshiin karayaan awood qaybsiga iyo gacan ku haynta goobaha muhiimka ah iyadoo wax walba laga hormarinayo danaha guud ee lagu midaysan yahay taas oo ah in gobolku noqdo meel tusaale u noqota gobollada  dalka intooda kale.

Waxaa nasiibdarro iyo guuldarro noqon doonta muran iyo iska hor-imaad hubaysan oo dhexmara muqaawamada oo aanu u haysano inay hoggaanka u hayaan culimada Soomaaliyeed oo dantoodu tahay dhaqangelinta sharciga ALLAH, Soomaalidu waxay doonaysaa inay aragto maamul Islaamka ku  dhisan oo ay gacanta ku hayaan dad ay ku kalsoon yihiin.

Laakiin  hadii taas la waayo oo ay arrintu noqoto khilaaf iyo gacan ka hadal waxaa la waayi doonaa kalsoonida shacabka iyo inta wanaagga la doonaysa Soomaaliya, arrintuna waxay ku dhammaan doontaa kud ka guur  oo qanje u guur iyo in laga cararo meeshii laga maqlo Islaamiyiin ayaa la wareegay.

Ujeeddada muqaawamada iyo dhammaan islaamiyiintu maaha in Kismayo ama gobol kale la qabsado, ama xukun la qabto, waxana la ogyahay halka ay arrimuhu ku dhamaan doonaan marka laga  tago ikhlaaska iyo ALLAH  dartiis in loo halgamo, dhab ahaan  risaalada qofka muslimka ah uu xambaarsan yahay waa mid  intaas ka qoto dheer, sidaas  awgeed  xoogagga islaamiyiinta waxaa looga fadhiyaa inay noqdaan dallad ay harsadaan dhammaan shacabka  burburka iyo colaadduhu ragaadiyeen.

Waxa lama huraan u ah in laga faa'idaysto cawaaqibkii laga dhaxlay khilaafkii dhexgalay Islaamiyiinta Afghanistan iyo kuwa Ciraaq iyo sida cadowgu uga faa'iday khilaafkooda, taas oo quraankuna ka digay muranka iyo khilaafka oo marka  dambe ku dhamada awooddii oo meesha ka baxda ka dibna lagu jabo.

Waa in muqaawamadu ogtahay inaan looga hari doonin tallaabooyinka ay qaadeen iyo gacan ku haynta  Jubbada Hoose, waayo waxaa  socda hawlo badan oo ay durba bilaabeen cadowga islaamka oo ku midaysan in islaamiyiinta laga saaro Kismayo ciddii kale ee doonta ha qabsatee, hadii cadowgu sidaa ku midoobo waa inay keentaa in dhinaca kale uu ku midoobo hanashada xilka culus ee uu dhabarka  u ritay.

Qof kasta oo Soomaali ahi wuxuu ogyahay oo ka dheregsanyahay wixii soo maray Geyiga Soomaaliyeed. waxaa lahubaa dhibku wuxuu ladhamaan layahay inuusan ahayn tamar yari iyo  dhaqaalo la,aan iwm. waxaase xaqiiqadu tahay waxa soomaaliya halkaas gaadhsiiyey waa Cadaalad daro ku dhisan Qabyaalad hadafkeeduna yahay Anaa xukumaya oo cunaya.

Haddii Muqaawamadu tahay koox ka duulaysa aragti iyo mabda' qiima leh waa suuragal inay ku soo dabaasho gobollada dalka ee ay hayaan nolol ka qiima badan halka ay wax gaadhsiyeen Jabhadihii ku loolamayey  1991 ilaa iyo 2008.

Waxaa loo baahan yahay dhismaha maamul midaysan oo dadku u siman yahay kuna dhisan aqoon, karti, amaano iyo awood xilgudasho, waxaa kale oo muhiim ah sugidda ammaanka iyo hawlgelinta kaabayaasha nabadgelyada sida saldhigga booliska, koontoroolada magaalada  laga galo, maxkamadaha sharciga, dhismaha bolilis hufan iyo dib uga shaqaysiinta ilaha dhaqaale sida dekedda,
garoonka dayuuradaha iyo kastamada.

Arrintu maaha in lagu tiirsanaado oo keliya awoodda  millateri ee hadda lagu saaray Barre, laakiin waa inay taliyaan aqoonta iyo fahamka diineed oo lagu dheehay bisayl iyo waaya-aragnimo, arrimaha  waa in loo kala hormariyo siday u kala mudan yihiin marka laga hadlayo dhaqangelinta shareecada, iyo in loo tooghayo dhaqdhaqaaqyada caalamka iyo aragtida laga qaatay dal iyo dibadba siday wax u dhaceen. waxaa muhiim ah in loodhaqmo lana ogaado in Aduunka Dad kale inala joogo oo mar walba u eegaya isbedel kasta oo dhacaa inuu yahay mid danahooda wax yeelaya inuu yahay iyo in kale. waxaan muhiim u arkaa inaan gobolo kale xiligan lajoogo Dagaalo iyo faragelin lagu deyin ama lagu degdegin.

Ugu dambaystii Muqaawamadu waxay ogtahay in gargaarka iyo hiilka  ALLAH oo keliya ay yihiin kuwa lagu taagan yahay taasina ay ku xiran tahay hadba masaafada xaqa loo jirsado, haddii gargaarka ALLAH uu meesha  ka baxana aanay caguhu dhulka  ku taagnaan doonin. Ilaahayna wuxuu u gargaaraan Awliyadiisa Dulmigana Ilaahay wuu necebyahay Cadaaladadana wuu Jecelyahay. Muslimkana God lagama qaniino labo jeer.
 
Sh. C/llaahi Cali Gaani.( Denmark)

gaani66@hotmail.com

webmaster@ceegaag.com