|
Haweeney
Soomaaliyeed oo Dalka Uganda ka raadineysa Askari ka tirsan
Ciidamada Amisom oo ay meher la’aan ugu dhashay Wiil.
(Kampala, Aug 25,
2008 Ceegaag Online)
Soomaalidu waa dad xirxiran oo dhowrsan, waana dad isla weyn
oo qabkoodu sareeyo waxay ahaan jirtay sifo dadkeena ay
laheeyeen taariikhiyan, laakiin isbedelka dhacay ee
qaranjabka ugu weyn yahay wuxuu na dhaxalsiiyay inaanu weyno
wax waliba oo qiime lahaa Diin ahaan, dhaqan ahaan iyo dad
ahaanba.
Dhaqanka lumaya ee
haweenkeena wuxuu ka mid yahay dhibatooyinka waaweyn ee hore
u bilownaa balse xaaladda la galay ay uga sii dartay,
duruufta jirtana ay sii quudisay ilaa heer gebi ahaan laga
tegayo dhaqankii suubaa iyo diintiiba.
Haweeneey
Soomaali ah oo wadadata Wiil yar oo ay u dhashay askari ka
tirsanaa ciidamada AMISOM gaar ahaan kuwa Uganda, ayaa
gaartay shan maalmood ka hor dalka Uganda, si ay uraadiso
ninkii ka dhalay wiilkeeda yar.
Gabadhan Soomaaliyeed oo lagu magacaabo Nino Omar Ibraahim
waa 23 sano jir,waxaana ay heysataa wiil 4 bilood jir ah
kaas oo ay u dhashay askari Ugandes ah oo ka mid ahaa
qeybti ugu horeeysay ee ciidamada Uganda ee soo gaaray
magaalda Muqdisho.
Nino Omar
Ibraahim, ayaa waxaa ay ka warbixisay habkii ay ku tagtay
dalka Uganda oo ay haatan ku sugan tahay,waxaan ay sheegtay
in ay kasoo carartay magaalada Muqdisho kadib markii ay soo
gaareen hanjabaadyo kaga imanay dad aysan garan kuwaas oo
ugu goodiyey in ay dili doonaan.
“Waxaan soo gaaray halkaan mudo haatan laga joogo shan
maalmood ah, waxaan soo maray dhib badan iyo xakaar
badan,ujeedeydu waa in aan helaa oo aan la midoobaa ninka
iga dhalay Wiilkan yar oo ah nin udhashay dalka Uganda” ayey
tiri Nino Omar Ibraahim.
Nina mar ay
ka hadleysay Askariga ka dhalay Wiilka waxa ay tiri "Haa
waan aqaanaa waana jeclahay,waxaan kula kulmay marki ugu
horeysay Cisbitaal ay ciidamada AMISOM ku leeyihiin
magaalada Muqdisho aniga oo halkaas u kaxeeyey aabaheey
Sheekh Ibraahim Omar oo xanuunsanaa markaasi”
Waxaa ay sheegtay in ay haatan diyaar u tahay in ay la
noolaato Askrigaan walibana ay aad ujeceshahay iyada oo ka
codsatay dadka reer Uganda in ay la radiyaan.
Nino oo haatan ku sugan xerada qaxootiga Kisenyi ee
magaalada Kampala halkaas oo ay kunool yihiin inta badan
qaxootiga Soomaaliyeed ayaa waxaa jimcihii la kulmay
Afhayeenkii ciidamada
Uganda
Maj. Paddy Ankunda
kaas oo usheegay in ay is dejiso isla markaana loo raadi
doono wixii xuquuq ah oo ka maqan gabadhani.
Maj.
Paddy Ankunda
oo isna saxaafada la hadlay ayaa sheegay in uu aqoon saday
askariga ka dhalay gabadhan wiilka ay heysato,waxaana
uu ku sheegay magaciisa yahay
Joshua Asiza.
“Haa waan aqaanaa waa sarkaal labo alifle ah oo ka mid ahaa
1,600 oo askari oo ka mid ahaa ciidamada Uganda ee AMISOM ee
la geeyey magaalada Muqdisho sanadi 2007, waxaa uu ka howl
gali jiray Cisbitalkeena ee magaalada Muqdisho,waan la
xiriiri doonaa,hadii uu qirto waa sidi la rabay hadiise uu
diido waa arin kale”sidaa waxaa yiri Paddy Ankunda.
Sida ay qoreen warbahinta dalka Uganda askarigaan ayaa laga
yabaa in uu inkiro waxa ay sheegeyso gabadha Soomaalida
ah,waayo ka hor inta aaney ka bixin dalka Uganda ciidamada
Uganda ee AMISOM waxaa qudbad dheer u jeediyey madaxweeynaha
Uganda Yuweri Museveni,kaas oo uga digay in ay ku kacaan wax
ka baxsan sharciga dalka Uganda.
Arintan ayaa waxaa aad uga naxay dadka Soomaaliyeed ee
kunool dalka kuwaas oo ka war helay wararka ku saabsan
gabadhani xili ay ku sugan tahay magaalada Kampala ee
xarunta dalka Uganda, waxaana falkani ay ku kacday gabadhani
Soomaaliyeed ee lagu magacaabo Nino Omar Ibraahim uu kasoo
horjeedaa Shareecada Islaamka maadaama ay dhashay wiil aan
ku dhalan Meher sharci ah.
www.ceegaag.com
webmaster@ceegaag.com |
