Qarax weyn ayaa saaka lala beegsaday Ciidamada AMISOM ee ka howlgala Muqdisho.

(Muqdisho, August  01,  2008 Ceegaag Online)

Qaraxa oo aad looga maqlay dhawaqiisa inta badan magaalada Muqdisho ayaa saaka goor hore ka dhacay wadada u dhaxeysa KM4 iyo garoonka caalamiga ah ee Aadan Cadde Airport ee magaalada Muqdisho, kaas oo lala beegsaday ciidamada nabad ilaalinta u jooga gudaha magaalada Muqdisho.

Ciidamada oo ku howlana baaritano ay ka wadeen wadada si ay uga bixiyaan waxyaabaha qarxa ayaa dad goob joogayal ah waxa ay sheegeen  in lagu qarxiyay miinada nooca meelaha fog fog laga hago,waxaana goobtii ka kacay uuro madow , waxaana la sheegayaa in ciidamada markaas ay fureen rasaas qadar socotay oo ay ku kala cayrinayeen dadkii ka agdhawaa goobta.

Khasaarihii ka dhashay qaraxaas ayaa la xaqiijiyay in ciidamada Uganda uu qaraxaasi uga dhintay hal askari oo ahaa midkii miinada dhulka ka baarayay.  ciidamada Dowladda oo goobta yimid qaraxa ka dib ayaa masjid u dhawaa goobta uu qaraxu ka dhacay kala baxeen 4 wadaad oo Tabliiq ah iyo 3 wiil oo Dhalinyaro ah kuwaas oo ay geeyeen Xarunta CID-da ee ciidanka Booliiska Dowladda Federaalka.

Qaraxan ayaa waxaa sheegtay in ay fuliyeen Kooxaha ka horjeeda Siyaasada Dowladda iyo Joogitaanka Ciidamada Nabad Ilaalinta AMISOM, Ma jiraan illaa iyo hadda wax war ah oo ka soo baxay ciidamada Uganda oo la xiriira qaraxa lala beegsaday ciidamadooda.

www.ceegaag.com

webmaster@ceegaag.com