Sheekh Shariif oo Qaahira kulamo xasaasi ah kula leh Jaamacadda Carabata iyo Garabka Asmara oo kulankaas eedeeyay.

(Qaahira, Aug 07,  2008 Ceegaag Online)

Gudoomiyaha Isbaheysiga Dib U Xoreynta garabka Jabuuti Sheekh Shariif Sheekh Axmed ayaa kulamo xasaasi ah kula qaatay Magaalada Qaahir xogheynta xoghayaha guud ee Jaamacada Carabta Axmed Bin Xilli kaasi oo ay isla soo qaadeen arrimo dhowr ah.

Kulamada labada Mas'uul ay kaga wada hadleen waxyaabihii kusoo cusboonaaday Xaalada Soomaaliya gaar ahaan khilaafka sii xoogeystay uu u dhexeeya xubnaha Isbaheysiga Dib U Xoreynta kuwaasi oo laba garab u kala jabay.

Ilo xog ogaal ah ayaa sheegaya in Masuuliyinta Jaamacadda Carabta iyo kuwa Masaariduba ay isku dayayaan in ay dhameeyaan khilaafka ka dhexeeya xubnaha Isbaheysiga ayna isu keenaan hogaamiyeyaasha Maxaakiimta ee ku kala sugan Asmara iyo Jabuuti.

Axmed Bin Xilli waxaa uu ballan qaaday waxyaabaha ay ka wadahadleen iyaga iyo wafdiga Dib U Xoreynta in uu u gudbin doono xoghayaha guud ee Jaamacadda Carabta si loo meel mariyo heshiiska dhawaan lagu saxeexay Magaalada Jabuuti ee dalka Djibouti.

Dhinaca kale Afhayeen u hadlay Isbahaysiga Dib U Xoreynta garabka ku sugan magaalada Asmara ee dalka Eritrea ayaa si kulul u eedeeyay kulanka Sheekh Shariif magaalada Qaahira kula yeeshay xunbo ka tirsan Jaamacada Carabta.

C/fitaax Maxamed ayaa sidoo kale dhaliil usoo jeediyay Dowlada Masar isagoo sheegay inay iska indho tirtay markii ciidamada Itoobiya ay dalka qabsanayeen taas oo uu yiri waxa ay ku ahayd Masar arin fool xun, isagoo dhanka kale ku amaanay doorkii ay xiliyadii hore ka qaadatay xornimo gaarsiinta dalka Soomaaliya xiligii gumaysiga.

www.ceegaag.com

webmaster@ceegaag.com