Jahwareer Siyaasadeed kii ugu xumaa oo ka taagan Magaalada Baydhabo ee Xarunta Barlamaanka Somalia.

(Baydhabo, December 09,  2008 Ceegaag Online) 

Madaxda sar sare ee Dowladda Federaalka Soomaaliya ee uu khilaafku ka dhaxeeyo ayaa ku wada sugan Magaalada Baydhabo ee Xarunta Gobolka Bay, iyagoo gooni gooni kulamo Siyaasadeed kula leh Xildhibaanada Barlamaanka.

Dhaq-Dhaqaaqa Siyasadeed ee maalmahan ka jira Baydhabo ayaa laga dareemay Xitaa goobaha ganacsiga ee dadka isugu yimaadan ee lagu cabo Shaaha ama cabitaanada kale dooda noocaas oo kale ayaa ka jirta, waxaa dhici karta mararka qaar inaad aragto dad badan oo ka doodaya muranka u dhaxeeya Madaxweyne C/llaahi Yuusuf iyo Ra'iisal Wasaarihiisa Nuur Cadde.

Hoyga ay ka dagan yihiin Baydhabo Madaxweynaha, Guddoomiyaha Baarlamaanka iyo Ra'iisal Wasaaraha ayaa Mashquul ah, waxaana ka dhaca daqiiqad kasta kulamo Siyaasadeed oo dhex maraya Madaxdaas iyo xubnaha Baarlamaanka.

Madaxweynaha Dowladda Federaalka C/llaahi Yuusuf Axmed ayaa qado uu u sameeyay qaar ka mid ah Xildhibaannada Baydhabo jooga waxaa uu kulankaas ka sheegay hadalkiisa ahaa in dalka aan wax dowlad ah ka jirin, isagoo Baarlamaankana ugu baaqay in ay qaadan tallaabooyin cad cad oo dalka wax looga qabanayo.

Ra'iisal Wasaaraha Dowladda KMG ah Nuur Xasan Xuseen (Nuur Cadde) ayaa isna Hotelka uu ka degan yahay Magaalada Baydhabo waxaa ka socda kulamo uu la qaadanayay Xubnaha Baarlamaanka isagoo ku war gelinayay Baarlamaanka inay taageeran Xukuumaddiisa cusub, Maamulka cusub ee Gobolka Banaadir iyo qodobadii ka soo baxay shirkii Jabuuti ka dhacay.

Afhayeenka Baarlamaanka Sheekh Aadan Madoobe ayaa qeyb ka ah kulamada ka socda Magaalada Baydhabo isagoo dhiniciisa ka abaabulaya kulamo Siyaasadeed oo looga hadlayay khilaafka ka dhex jira Madaxda Dowladda

Maalmaha soo socda ayaa la ogaan doonaa halka ay ku biyo shubato Xaaladda Siyaasadeed ee ka dhex taagan Madaxweyne C/llaahi Yuusuf iyo Ra'iisal Wasaare Nuur Cadde.

www.ceegaag.com

webmaster@ceegaag.com