Madaxweyne C/llaahi Yuusuf oo xilkii ka qaaday Ra’iisal wasaare Nuur Cadde.

(Baydhabo, December 14,  2008 Ceegaag Online) 

Madaxweynaha Dowladda Federaalka Soomaaliya Mudane C/laahi Yuusuf Axmed oo goor dhaweyd shir jaraa'id ku qabtay magaalada Beydhabo ayaa  xilkii Ra’iisal Wasaarenimo ka xayuubiyay Nuur Xasan Xuseen (Nuur Cadde).

Madaxweyne C/llaahi Yuusuf ayaa sheegay inuu xilka ka casilay Ra’iisal wasaaraha islamarkaana uu dhawaan soo magacaabi doono Ra’iisal wasaaraha cusub, waxa uuna shirka Jaraa’id ee uu qabtay kaga dhawaaqay inuu soo saaray Digteero uu xilka kaga qaadayo Ra’iisal wasaare Nuur Cadde.

Madaxweynaha ayaa ku eedeeyey Ra’iisal wasaaraha inuu gudan waayey xilkii loo magacaabay sanad ka hor, islamarkaana uu dalka ku soo kordhiyey qas iyo fowdo, isagoo ku eedeeyay inuu sabab u yahay qabsashada Gobollada Koofureed iyo kuwa Bartamaha Soomaaliya ay qabsadeen Kooxaha Islaamiyiinta.

Madaxweyne C/llaahi Yuusuf iyo Ra'iisal Wasaaraha uu Xilkii ka xayuubiyay ee Nuur Cadde ayaan in muddo ahba iskuma fiicnayn, iyadoo Khilaafkoodu uu billowday markii Golaha Wasiirradu ay xilka ka xayuubiyeen Gudoomiyihii  hore ee Gobolka Banaadir Maxamed Cumar Xabeeb (Max’ed Dheere).

Go'aankan Xilka ka qaadista Nuur Cadde ayaa kusoo beegmaya maalmo ka hor markii ay Dowladda Ethiopia ku dhawaaqday in ay Ciidamadeeda ka jooga Somalia ay kala baxayso.

www.ceegaag.com

webmaster@ceegaag.com