Magalada Boosaaso oo looga dhawaaqay golaha isbedel doonka Puntland

(Boosaaso, December 04,  2008 Ceegaag Online)

Qoraal Saxaafadda ay ugu talogaleen ayuu Golaha soo saaray kaasoo ay ku muujiyeen dhinacyada dhaqaalaha., Siyaasadda iyo Amniga oo ay sheegeen in maamulka Puntland uu ku guul darreystay waxyaabo badan oo laga qaban lahaa.

Xubnaha Golahan waxaa guddoomiye u ah C/risaan Xuseen Gaceyte, waxaana guddoomiye ku xigeen u ah Muuse Cali Jaamac, halka afyeenka Golahaasi uu yahay C/kariin Saalax Cali.
"Laascaanood gacan kuma jirto, gobolka sanaag xaafado ka mid ah waa layska soo galaa, Gaalkacayo waxaa ka jira khalkhal oo waxaa si joogta ah loo dilaa waxgaradka" ayuu yiri Guddoomiye ku xigeenka Golaha cusub ee Isbedel doonka.

Guddoomiye ku xigeenka Golaha Isbedel doonka Puntland Muuse Cali Jaamac oo saxaafadda ugu warramay Hotel Huruuse ee magaaladan Boosaaso ayuu wuxuu ku nuux nuuxsaday in dhisitaanka golahan ay ka dambeysay ka dib markii ay arkeen baahida jirta in la helo awood u hadasha shacabka Puntland.
Guddoomiye ku xigeenka waxa uu farta ku fiiqay maamulka Puntland inuu ku guul darreystay sugida xuduudaha Puntland.

Waxaa uu sidoo kale ka hadlay arrimaha tahriibta, burcadbadeeda iyo afduubyada dadka ajnabiga loo geysto, waxa uuna ku tilmaamay arrintaasi inay dhiirigelisay ka dib markii la bixin waayay mushaharooyinka ciidamadii sugi lahaa ammaanka.

Inkastoo golahan uusan sheegin inuu yahay mid doonaya inuu lug ku yeesho siyaasadda haddana waxaa loo qaadan karaa inuu qeyb ka yahay ololaha tartanka doorashada madaxtinimada marka loo eego waqtiga lagu soo beegay iyo xubnaha qaar ee ka dhexmuuqda ay horey siyaasadda ugu soo jireen.

Si kastaba ha ahaate waxaa laga warsugayaa talaabada ay qaadaan golahan cusub iyo sida ay u shaqeeyaan maadaama ay gole siyaasadeed yihiin.

C/rashiid Maxamed Daahir
Boosaaso. lacle1004@gmail.com

webmaster@ceegaag.com