Soomaali badan oo saakay waaberigii hore lagu qab-qabtey Magaalada Addis-Ababa

(Adis-Ababa, December 25,  2008 Ceegaag Online) 

Ciidamada Booliska dalka Itoobiya ayaa Magaalada Addis-Ababa ka qabqabtey dad fara badan oo soomaali ah taasoo cabsi ku abuurtey Soomaalidii kale ee Magaaladaasi ku dhaqnayd.

Shalay waaberigii ilaa xalay ayaa waxaa mar qura hurdada looga toosay qeylo iyo albaab garaac ay sameeynayeen ciidamada booliiska federaalka Itoobiya oo guryaha ugu dhacayay dadka Soomaalida ah kuwaas oo xirxiray cid kasta oo Soomaali ah oo kasoo hor baxa hadii ay ahaan lahaayeen waayeel, caruur aad u da’ yar, haween  iyo dhalin yaro intaba.

Inkasta oo aan si saaxi ah loo ogeyn sababta rasmiga ah ee ka dambeysa xaraaskan hadana waxaa la sheegayaa in dadka la waydiinayo su’aalo ay ka mid yihiin halka uu qofku ka yimi, sababaha uu Adis ababa u joogo iyo mudada uu joogay inta ay la egtahay iyo sida la sheegay hadii ay jiraan wax xiriir ah oo uu la leeyahay kooxaha ka dagaalama dalka Soomaaliya.

Arinta la xiriirta xiritaanka Soomaalidan ayaan aheyn tii ugu horeeysey oo waxay socotey tan iyo dhamaadkii Ramadaankii ina dhaafay balse waxaa midkan lagu tilmaami karaa  inuu yahay kii ugu badnaa marka ay timaaddo tirada dadka la xirxiray oo war ku dhow dhow safaarada Soomaalidu ay tibaaxayaan in tiradu gaareyso ilaa 1,300 (kun iyo sedex boqol) oo  qofood oo ku kala xiran ilaa 7 saldhig booliis inkasta oo la sheegay in la sii deyn doonana weli ma jirto cid lasii daayay.

Ilaa iyo hada si rasmi ah ugama hadlin dowlada federaalka ah ee Itoobiya balse arintan ayaa kusoo beegmeysa xilli ay dowlada Itoobiya todobaadkan horaantiisa shaacisay inay diyaarisay qorshe dhameystiran oo ay ciidamadeeda kaga soo qaadaneyso dalka Soomaaliya dabayaaqada bishan December ee aynu ku jirno.

www.ceegaag.com

webmaster@ceegaag.com