Ra’isul wasaare Nuur Cadde iyo Golihiisa Wasiirada oo kulankoodii ugu horeeyey maanta ku yeeshay Magaalada Baydhabo.

(Baydhabo, January 12, 2008 Ceegaag Online)  

Golaha cusub ee wasiirada xukuumada Federaalka Soomaaliya ayaa maanta kulankoodii ugu horeeyey ku yeeshay xarunta madaxtooyada magaalada Baydhabo iyadoo kulankaasi uu shir gudoominayey Ra’iisal Wasaaraha Xukuumada Federaalka Nuur Xasan Xuseen (Nuur Cadde) uu ahaa mid ay albaabadu u xiran yihiin oo looga wada hadlay qodobo muhiim ah.

Ra’isal Wasaare ku-xigeenka ahna wasiirka Warfaafinta dhalinyarada iyo Isboortiga ee xukuumada federaalka Axmed Cabdi Salaan oo markii uu kulankaasi dhamaaday saxaafada kula hadlay meel ka baxsan goobta uu kulankaasi ka dhacayey ayaa sheegay in kukankooda ugu horeeyey ee ay maanta isugu yimaadeen golaha wasiirada ay uga wada hadleen qodobo muhiim ah oo uu sheegay iney ka mid ahaayeen xaalada uu dalku ku sugan yahay iyo sidii wax looga qaban lahaa xaaladaha amaanka ee ka sii daraya, isagoo sheegay in sidoo kale ay kulankooda uga wada hadleen sidii loo dardar gelin lahaa howlaha adag ee hor yaala golaha wasiirada iyo sidii dib u heshiisiinta loo wajahi lahaa.

Waxaa uu sheegay wasiirku in dhamaanba ay isku afgarteen golaha wasiirada Qodobadii ay ka wada hadleen, waxaana kulankan uu noqonayaa kulankii ugu horeeyey ee ay iskugu yimaadaan golaha wasiirada ee xukuumada cusub ee uu dhawaan soo dhisay Ra’iisal wasaare Nuur Xasan Xuseen (Nuur-cadde), tan iyo intii ka dambeeyey markii xildhibaanada Baarlamaanku uu cod Aqlabiyad ku ansixiyeen xukuumada maalmo ka hor, waxaana dad badan ay isweydiinayaan  waxa xukuumadan ay ka qaban adoonto xaalada adag ee dalku ku sugan yahay.

www.ceegaag.com

webmaster@ceegaag.com