|
Mu`tamarkii
Norway ee ey soo qaban-qaabiyeen Hay`adaha Al-Manhal &
Kafaalo oo lasoo gaba-gabeeyay.
(Norway, January
07,
2008 Ceegaag Online)
Waxaa
maalintii shalay aheyd lagu soo gabo-gabeeyay magaalada Oslo
ee dalka Norway mu`tamar socday labo cisho oo loogu magac
daray "HORUMARINTA SAMAFALKA & ISKAASHIGA" kaasoo ey soo
qaban-qaabiyeen hey`adaha AL-MANHAL iyo KAFAALO oo iyagu ah
hey`adaha kaliya ee xanaaneeya kana damqada agoonta
soomaaliyeed iyo dadka danyarta ah
Mu`tamarkan
oo ey kasoo qeybgaleen culimo waaweyn oo magac iyo maamuusba
ku leh bulsho-weynta soomaliyeed ayaa ka kala yimid wadamada
Sacuudiga, Kuwait, Danmark iyo Mareykanka iyagoo isugu jiray
Somali iyo carab, waxeyna halkaasi ka jeediyeen
muxaadarooyin kala duwan oo ey runtii dadku aad uga
faa`iideysteen.
Marka laga soo tago muxaadarooyinka diiniga ah ayaa ula
jeedka mu`tamarkani ahaa mid dadweynaha reer Norway loogu
bayaaninayay waxqabadka hey`adaha Al-manhal iyo Kafaalo
oo tabarucayaashooda ugu badan ku dhaqan yihiin dalkan
Norway.
Dadweynaha ayaa loo soo bandhigay waxqabadka hey`adaha oo
lahaa maqal iyo muuqaalba, waxeyna dadweynuhu inta badan u
qaadan waayeen marki ey daawadeen loona sharaxay waxqabadka
sida howshaas baaxadda leh oo isugu jirtay mashaariic dhisme
sida iskuulo, isbitaalo, masaajido boqol kor u dhaafaya iyo
mashaariic kale ey usuuro gashay mudadaas gaaban ee ey
labadan hey`adi jireen.
Mid ka mid ah
dadweynihi markaasi la yaabanaa waxqabadka uu indhihiisu ku
arkay oo magaciisa la yiraado "Xasan" ayaa yiri "walaahi
waxii mashruuc ahaa oo aan maanta indhaheyga ku arkay
marnaba isma laheyn labo boqol oo aad bixiso ayaa sahleysa",
wuxuuna intaa raaciyay in uu maanta laga bilaabo rumeysan
yahay maah-haamdii soomaaliyed ee aheyd "Quraansho uruurtay,
mulac waa jiidaa".
Mu`tamarkan mid la mid ah ayaa waxa uu ka dhacayaa maalmaha
sabtiga iyo axada ee fooda inagu soo haya taariikhduna ku
beegan tahay 12-13/Janaayo/08 magaalada Stockholm ee
dalka Swedan (Ringby Skole), waxaana sidoo kale dadweynaha
reer Swedan iyana nasiib u yeelan doonaan in ey indhahooda
ku arkaan waxyaalihii ka yaabiyay reer Norway ee ahaa
mashaariicda kala duwan ey hey`adaha kafaalo iyo Al-manhal
ka wadaan gudaha dalkeena Soomaaliya.
Ugu danbeytii waxaa duco iyo amaan balaaran loogu soo
qatimay mu`tamarka masuuliyiinta hey`ada Kafaalo iyo Al-Manhal
oo runtii wax weyn ka badalay xaaladda agoonta iyo dadka
danyarta ah ee ku sugan daafaha dalkeena, waxaana sidoo kale
iyana amaan iyo duco halkaa looga soo jeediyay dhamaan
kafiilada iyo tabarucayaasha ku kala sugan dunida
dacaladeeda iyagoo lagu amaanay in la`aantood howshan eysan
marnaba suuro gali laheyn.
Xigasho:
Calanka
www.ceegaag.com
webmaster@ceegaag.com |
