Ra'iisal Wasaare Nuur Cadde oo ku Guuleystay in uu  xabsiga ka sii daayo xubno kamid ah golaha dhaqan-ka  Beelaha Hawiye.

(Muqdisho, January 27, 2008 Ceegaag Online)  

Xubnaha xabsiga laga sii daayey  ayaa waxaa kamid ah Afhayeenkii Golaha Dhaqanka Beelaha Hawiye Axmed Diiriye Cali, C/laahi Dheere oo ah afhayeenka dhinaca siyaasadda beelaha Hawiye, jimcaale Jeebweyne ku xigeenka guddoomiyaha golaha dhexe, Cabdi Nuur Axmed Diiriye, iyo xubin ka tirsan golaha dhaqanka Hawiye.

Xubnahaan ayaa in muddo ah ku jiray xabsiyo ku yaala magaalada Muqdisho kadib markii ciidamo ka tirsan dowladda federaalka ay kasoo qabteen qeybo ka mid ah magaalada Muqdisho.

C/laahi Dheere oo kamid ah xubnaha la sii daayey ayaa warbaahinta Muqdisho u sheegay in sii deyntooda uu gacan weyn ka geystay Ra'isul wasaaraha dowladda federaalka Nuur Xasan Xuseen (Nuur Cadde).

C/laahi dheere wuxuu intaa raaciyey in mudadii ay xabsiga ku jireen si fiican loola dhaqmay oo aan loo geysan wax xadgudubyo ah, marka laga reebo xoriyadooda qof ahaaneed oo la lumiyey.

Ra'isul wasaare Nuur Cadde iyo Xubno ka tirsan Golihiisa Xukuumada ayaa gacan weyn ka geystay Siideynta xubnahan maanta la sii daayay waxaana sii deyntooda soo dhaweeyay ururada Bulshada Rayidka ah iyo Dhamaan qeybaha kala duwan ee ku dhaqan magaalada Muqdisho.

Xubnahaan la sii daayey ayaa ciidamo ka tirsan dowladda federaalka waxa ay dabayaaqadii sanadkii aan soo dhaafnay ka qab-qabteen qeybo kamid ah magaalada Muqdisho.

Xafiiska Wararka Ceegaag Online Muqdisho, Somalia

Axmed Aadan Ibraahim

axmedmadoobe@hotmail.com

webmaster@ceegaag.com