Ra'iisal Wasaare Nuur Cadde iyo Wafdi uu hoga-aminayo oo soo gaaray Magaalada Muqdisho.

(Muqdisho, January 20, 2008 Ceegaag Online)  

Diyaaraddii waday Ra'iisal Wasaaraha Dowladda Federaalka Soomaaliya ayaa soo caga dhigtay Garoonka Diyaaradaha ee Magaalada Muqdisho kadib markii uu saaka ka soo kictimay Magaalada Baydhabo ee xarunta Dowladda Federaalka Soomaaliya.

Wafdiga Ra'iisal Wasaaraha ayaa waxaa Garoonka Diyaaradaha ku soo dhaweeyay Guddoomiyaha Gobolka Banaadir ahna Duqa Magaalada Muqdisho Maxamed Dheere, Taliyaha Booliska Cabdi Qeybdiid, Salaad Cali Jeelle, Cabdi Fatax Ibraahim Shaaweeye oo ka mid ah kuxigeenada Gobolka Banaadir.

Ra'iisal Wasaaraha ayaa waxaa uu salaan ka qaatay Ciidamada Qaranka Soomaaliya gaar ahaan kuwa Bambeyda ee Booliska Soomaaliyed, waxaana madaxa loo geliyay Ra'iisal Wasaaraha Ubax oo gabar yar siday.

Wafdiga Ra'iisal Wasaaraha waxaa ka mid ah Wasiirka Warfaafinta, Sportiga ahna kuxigeenka Ra'iisal Wasaaraha Axmed C/salaan Aadan.

Ra'iisal Wasaare Nuur Cadde oo Wariyaasha kula hadlay Garoonka diyaaradaha ayaa sheegay in uu wax ka qaban doono Dhibaatooyinka kajira Magaalada Muqdisho, isagoo ka codsaday Mas’uuliyiinta iyo Bulshada in ay gacan buuxda kusiiyaan.

Waa markii ugu horeysay oo Ra'iisal Wasaare Nuur Cadde yimaado Magaalada Muqdisho tan iyo markii loo magacabay Jagada Ra'iisal Wasaaraha Soomaaliya, dhamaadkii sanadkii tagay..

www.ceegaag.com

webmaster@ceegaag.com