Ra’iisal Wasaare Nuur Cadde oo maanta Baarlamaanka hor geeyay Golaha Wasiirada Cusub ee uu dhawaan soo dhisay.

                                                       (Baydhabo, January, 08  2008 Ceegaag Online)

Ra’iisal Wasaaraha Soomaaliya Nuur Xasan Xuseen (Nuur Cadde) ayaa maanta ugudbiyay Golihiisa Wasiirada Cusub Baarlamaanka Soomaaliya si loogu qaado Codka Kalsoonida taas oo ay jiraan Xildhibaano aan tiro badneyn oo ka hor yimid Xukuumadan Cusub.

Inta Badan Xildhibaanada Baarlamaanka ayaa u muuqda kuwo ku qanacsan Xukuumadan tirada yar ee hadana Tayadeedu ay aad u sareyso iyadoo Baarlamaanku Labo maalmood kaga doodi doona Barmaamijka Xukuumada Cusub ee uu Ra’iisal Wasaaruhu hor dhigay.

Ra'iisul wasaare Nuur cadde oo saxaafada la hadlay ayaa sheegay inuu rajo wanaagsan ka qabo kalsooni siinta Xukuumadiisa, isagoona xusay inuu ku kalsoon yahay Xildhibaanada oo ay kalsooni siinayaan Xukuumadan Cusub.

Ra’iisal Wasaare Nuur Cadde ayaa maanta oo Salaasa ah waxaa kaga ekeed Mudadii gaabneed ee uu ka dalbaday Baarlamaanka in uu kusoo dhiso Xukuumad kooban oo tayo leh isagoo Barmaamij Siyaasadeedka Dowladdiisana Diirada ku saaray Arimaha Dib u Heshiisiinta waxa uuna Xildhibaanada ka codsaday in ay ku garab istaagaan Dadaalka uu ugu jiro sidii Dalka Nabadgalyo Waarta looga dhalinlahaa.

Ammaanka Xarunta ADC ayaa ahayd mid aad loo adkeeyay, iyadoo Ciidamo isugu jira Ethiopian iyo Soomaali la geeyay, Xarunta ADC-da Magaalada Baydhabo kuwaas oo lasheegay in ay aad ula socdaan dhacdhaqaaqa goobta shirka, si dooda xildhibaanada iyo cod u qaadida Xukuumada aysan buuq iyo jahwareer uga dhalan maadaama ay jiraan dad tiro yar oo hadh iyo jeer u guntaday Mijo xaabinta Xukuumada Cusub ee ay Shacabka Soomaaliyeed iyo Beesha Caalamkuba soo dhaweeyeen.

www.ceegaag.com

webmaster@ceegaag.com