|
Ra'isul wasaare
Nuur Cadde ayaa maanta xarunta madaxtooyada ee Villa Somalia
kulan kula qaatay guddiga ganacsatada gobolka Banaadir.
(Muqdisho,
January 23,
2008 Ceegaag Online)
Kulanka oo
ahaa mid muhiim ah ayey labada dhinac uga wada hadleen
xaaladda amaan ee suuqa weyn ee Bakaaraha oo maalmahaan
warar soo baxayey ay sheegayeen in ciidamo katirsan dowladda
ay la wareegayan Amaanka suuqa iyo Nawaaxigiisa.
Kulankan ay
yeesheen Ra'isul wasaaraha Somalia Nuur Xasan Xuseen (Nuur
Cadde) iyo guddiga ganacsatada gobolka Banaadir ayaan ilaa
iyo hadda wax natiijo ah ka soo bixin, waxaana jira kulan
gaar ah oo yeelanayaan ganacsatada gobolka Banaadir oo looga
arinsanayo xaaladda suuqa Bakaaraha.
Kulanka ay
maanta yeesheen Ra'isulwasaare Nuur Cadde iyo guddiga
ganacsatada gobolka Banaadir ayaa waxa uu daba socdaa kulamo
dhawaanahaan ay yeelanayeen guddiga amaanka gobolka Banaadir
iyo ganacsatada gobolka, waxaana kulamadaas ku yimid dib u
dhacyo markii la isku afran waayey qaabka loo wajahayo suuqa
bakaaraha.
Waa markii
ugu horeysay ee Ra'isul wasaare Nuur Cadde uu kulan la qaato
ganacsatada gobolka Banaadir tan iyo markii uu soo gaaray
magaalada Muqdisho, iyadoo kulankan uu sidoo kale imaanayo
kadib markii ay kulamo noocaan ah ay isku mari waayeen
guddiga amaanka gobolka iyo midowga ganacsatada gobolka
Banaadir.
Xafiiska
Wararka ee Muqdisho, Somalia
Axmed Aadan
Ibraahim
Ceegaag.com
webmaster@ceegaag.com |
