Bayaan Laga soo saaray koox ku hadashay Magaca Xarakada Islaax.

(Muqdisho January 17, 2008 Ceegaag Online)  

Waxaa qaar ka mid ah qalabka warbaahinta lagu faafiyay hadalo ah in la bedelay madaxdii, golayaashii iyo nidaamkii Xarakada Islaax lana sameeyay hogaan cusub, iyagoo tixraacaya qoraal ay soo saareen xubno aan Xarakada Islaax ka tirsannayn Taariikhdu markii ay ahayd 10/1/2008.
Waxaa wax lala yaabo ah in kooxdani ku andacoodaan wax aysan awood u lahayn, Xaqiiqadana  ka fog.

Hadaba Xarakada Islaax waxay cadaynaysaa

1) In hadaladaas ay yihiin been aan sal iyo raad toona lahayn;

2) kooxdan sheegatay magaca ururku maaha xubno ka tirsan ururka, muddo ka hor ayaa qaarkood ururka laga saaray markii ay khilaafeen mabaadida iyo nidaamka ururka, qaar kalena iskood uga tageen.

3) Waa koox ku biiray Maxaakimtii Islaamiga ahaa, qaarkoodna ka mid yihiin hogaanka sare ee Maxaakimta.

Hadaba, waxaan ogaysiinaynaa xubnaha ururka, taageerayaashiisa iyo guud anaaba shacbiga Soomaaliyeed in xarakada Islaax aysan wax shaqo ah ku lahayn hadalada iyo ficilada ka soo fulaya kooxdaasi sida beenabuurka ah ugu hadlaya magaca ururka.

Waxaa kale oo aan sii adkaynaynaa in xarakada Islaax ay mar walba u taagan tahay fidinta Diinta Islaamka, ku dhaqanka manhajka ictidaalka, u-adeegidda bulshada Soomaaliyeed, horseedida arimaha dib u heshiisiinta, iyo ugu baaqidda wadada nabadda , wadahadalka iyo walaalnimada.

Ugu dambayn waxaan kooxdan ugu naseexaynaynaa inay ka waantoobaan hadalada been abuurka ah oo u horseedi kara aduunyo iyo aakhiro beel, kana shaqeeyaan wax anfaca naftooda iyo umadooda.

Maqaalka nala soo gaarsiiyay ayaa u dhignaa sidan

www.ceegaag.com

webmaster@ceegaag.com