Caamir Muusa oo dalalka carabta ugu baaqay in ay gurmad gaarsiiyaan shacabka Soomaaliyeed.

(Qaahira, January 31, 2008 Ceegaag Online)

Xoghaya guud ee ururka Jaamacadda carabta Caamir Muusa ayaa ugu baaqay wadamada carabta in ay gacan weyn ka geystaan sidii nabad iyo xasilooni loogu soo dabaali lahaa dalka soomaaliya.

Caamir Muusa ayaa ka codsaday dalalka carabta in ay gar-gaar dhinacyo badan leh la gaaraan dadka barakacay ee ku dhibaateysan gudaha soomaaliya, isagoo sheegay in loo baahan yahay in dalalka carabtu ay gurmad u fidiyaan walaalohooda Soomaaliyeed ee dhibatooyinka isbiirsaday ay ku heystaan dalka Soomaaliya.

"Waa in dadka tabaaleysan gacan bino'aadanimo loo fidiyaa, lana taageeraa si dadkaasi ay u helaan gurmad dhinacyo badan leh" ayuu yiri Caamir Muusa.


Wuxuu ugu baaqay dhinacyada Soomaaliya in ay wada hadal ku xaliyaan mushkiladda dabadheeraatay ee ka aloosan gudaha Somalia, isagoo xusay in miiska wadahadalka lagu xalin karo mushkilad kasta oo dhacda.

Hadalka Caamir muusa ayaa ku soo beegmaya xilli gudaha soomaaliya ay ka jiraan xaalado aad u adag oo la soo dersay dad Soomaaliyeed oo ka barakacay dhibaatooyinka iyo dagaalada ka jira magaalada caasimadda ah ee Muqdisho.

Xafiiska Wararka Ceegaag.com Muqdisho, Somalia

Axmed Aadam Ibraahim

axmedmadoobe@hotmail.com

webmaster@ceegaag.com