Ciidamada dowlada iyo kooxo hubeysan ayaa saakay dagaal uu ku dhexmaray qeybo ka tirsan degmada Wardhiigley ee magaalada Muqdisho.

(Muqdisho, January 31, 2008 Ceegaag Online)

Dagaalka ayaa bilowday markii kooxo hubeysan ay weerar ku qaadeen fariisimo ay ciidamada dowladda ku leeyihiin xaafadda Geed-jaceyl ee degmada Wardhiigley magaalada muqdisho.

Dagaal muddo daqiiqadaha ah socday ayaa halkaasi ka qarxay, waxaana dagaalkaasi uu gebi ahaanba hakad geliyey dhaq-dhaqaaqii ganacsi ee halkaas ka jiray.

Inta la xaqiijiyey gabar dhalinyaro ah ayaa ku dhaawacantay rasaastii ay labada dhinac isweydaarsanayeen, taas oo la sheegay in ay xabad habow ah ugu tagtay hoygii ay deganeyd oo ku dhow halka lagu dagaalamay.

Dagaalka ayaa waqti dambe iskiis u joogsaday iyadoo ciidamada dowladdana ay dib ugu laabteen fariisimohooda.

Ma ahan markii ugu horeysay oo ciidamada dowladda KMG iyo kooxaha ka horjeeda ay ku dagaalamaan qeybo kamid ah degmada Wardhiigleey ee magaalada Muqdisho.

Xafiiska Wararka Ceegaag.com Muqdisho, Somalia

Axmed Aadam Ibraahim

axmedmadoobe@hotmail.com

webmaster@ceegaag.com