Dagaal xalay ka dhacay Warshadii hore ee Baastada ee Magaalada Muqdisho.

(Muqdisho, January 23, 2008 Ceegaag Online)  

Dagaal Xoogan ayaa abaaro 11:00 habeenimo xalay waxa uu ka qarxay warshaddii hore ee Baastada kadib markii xoogagga ka horjeeda joogitaanka ciidamada Itoobiya iyo siyaasadda dowladda federaalka ay weerar ku qadeen halkaas.

Daryanka hubka noocyadiisa iyo madaafiic xooggan ayaa si weyn looga maqlayey xaafadaha ku teetsan halkaas, iyadoo dagaalku uu socday muddo saacado ah.

Madaafiic habow ah ayaa xalay waxa ay ku dheceen qeybo ka tirsan degmooyinka Yaaqshid iyo Huriwaa, iyadoo madaafiicdaas ay ku dheceen meelo cidlo ah oo aaney dad deganeyn.

Si dhab ah looma oga khasaaraha ka dhashay dagaalkii xalay ka qarxay Warshadii hore ee Baastada, Mana jiro wax howlgal ah oo saakay ay halkaas ka fulinayaan ciidamada Itoobiya ee xalay lagu weeraray xarunta ay ka deggan yihiin warshaddii hore ee Baastada.

Xoogagga hubeysan ee ka horjeeda ciidamada Itoobiya ayaa weeraro xilli kasta ku qaada xarumaha ay saldhigada ku leeyihiin ciidamada Itoobiya iyo kuwa dowladda federaalka, iyadoo weerarkaan xalay lagu qaaday warshadda Baastada uu ku soo beegmayo xilli aaney habeenadii la soo dhaafay wax dagaalo ah ka dhicin magaalada Muqdisho.

Axmed Aadan
Ceegaag.com
Xafiiska Wararka Muqdisho, Somalia

webmaster@ceegaag.com