Dhaawacyada inka badan 40-qof oo rayid ah ayaa saacadihi ugu dambeeyey la dhigay isbitalka Keysa-neey ee magaalada Muqdiosho.

(Muqdisho, January 29, 2008 Ceegaag Online)

Dadkan oo u badan Caruur iyo Haween ayaa ku soo waxyeeloobay iska hor-imaadyo shalay illaa xalay ka dhacayey qeybo kamid ah degmooyinka Huriwaa iyo Yaaqshid, waxaaa qaar kamid ah dadkaas la sheegay in dhaawacoodu uu yahay mid aad halis u ah.

Madaxa caafimaadka ee isbitaalka Keydsaney Cali Bile ayaa sheegay in 2-qof oo ka mid ahaa dhaawacyo shalay isbitaalka la soo gaarsiiyey ay u geeriyoodeen waxyeelo ka soo gaartay madaafiic ku soo dhacay guryo ay deganaayeen, isagoo intaa raaciyey in hadda kalkaaliyaasha iyo dhaqaatiirta caafimaadka ay ku howlan yihiin samata bixinta dadkaas dhaawaca ah.

Wuxuu intaa raaciyey in isbitaalka oo ay horey u jiifeen 90-qof oo dhaawacyo ah ay hadda tirda guud ka dhigeyso 130-qof.

Dadkan dhaawacyada ah ee la gaarsiiyey isbitaalka Keydsaney ee kuyaala duleedka Bari ee magaalada Muqdisho ayaa waxyeelada ugu badan waxa ay ka soo gaartay madaafiic ku habsatay xaafadihii ay deganaayeen oo ku yaala degmooyinka Huriwaa iyo Yaaqshid.

Isbitaalada Madiina iyo Keydsaney ayaa hadda noqday labada Isbitaal ee sida tooska ah loo dhigo dadka ku waxyeelooba dhibaatooyinka iyo dagaalada ka dhaca magaalada Muqdisho, waxaaana Isbitaaladaas ay hadda la ciirciirayaan xadiga dad badan oo ku soo waxyeeloobay dagaalo iyo qaraxyo ka dhacay Magaalada Muqdisho.

Xafiiska Wararka Ceegaag Online Muqdisho, Somalia

Axmed Aadam Ibraahim

axmedmadoobe@hotmail.com      

 

webmaster@ceegaag.com