Dugsi sare oo cusub ayaa laga dhisayaa Magaalada Jig-Jiga ee Xarunta Ismaamulka Soomaalida.

                                               (Jig-Jiga, January, 09 2008 Ceegaag Online)

Dugsi sare oo cusub ayaa laga dhisayaa  magaalada Jig-Jiga ee Xarunta Ismaamulka Soomaalida Itoobiya, sida ay sheegayaan warar laga helay xafiiska waxbarashada ee deegaanka, Dugsigan oo ay dhismihiisa ku baxayso lacag dhan 10 milyan oo birr ayaa lagu wadaa in lagu dhamaystiro muddo 18 bilood ah.

Wasiir Ku-xigeenka xafiiska waxbarashada, Idris Maxamed, ayaa sheegay in dhismaha dugsigu noqday lama-huraan kadib markii dugsiyadii hore ee Magaaladu ay dabooli waayeen baahida waxbarsho ee ardayda Jigjiga oo aad u korodhay.

"Qaar kamid ah ardayda dugsiyada sare ee Jigjiga ayaa waxbrashadooda ku qaata fasalada dugsiyada hoose ee magaalada kadib markii ay dugsiyada sare awoodi kari waayeen in ay meel u helaan" ayuu yiri idiris Maxamed oo ah Wasiir ku-xigeenka waxbarshada.

Magaalada Jigjiga waxaa soo buux dhaafiyey ardey ka timaada gobolada kale ee dalka oo ay ka jirto baahi dugsi la'aan iyo nabadgaliyo xumo.

Inkastoo Ismaamulka soomaalidu yahay gobolada ugu dib-dhacsan Itoobiya, hadana waxbarshadu waxa ay kamid tahy meelaha yar ee horumar la dareemi karo laga sameeyey,Tirada ardayda dhigato dugsiyada sare iyo kuliyadaha Jaamadaha dalka ee kala duwan ayaa kor u kacay sanadhii la soo dhaafay. Waxaa intaa dheer in ay shaqaalaha Dowladu helaan fursado waxbarasho oo ay dalka dibadiisa wax ku soo bartaan.

Xigasho:Somalistate

www.ceegaag.com

webmaster@ceegaag.com