Goobihii uu saaka Dagaalku dhacay ee Magaalada Bosaaso oo Degan (Daawo Sawiro)

(Boosaaso January 10, 2008 Ceegaag Online)

Waxa degenaansho laga soo sheegayaa goobihii uu saaka Dagaalku ka dhacay ee gudaha Magaalada Bosaaso, goobahaasi ayaa waxa lagu arki karayaa Kumanaan dad ah oo taagan kuwaasi oo u soo daawashada tegay goobahaasi uu Dagaalku ku dhex maray Ciidamada Maamulka Puntland iyo Malayshiyadii daacada u ahay Wasiirkii Hore ee la casilay Siciid Maxamed Raage.

Dagaalkii saaka ka dhacay gudaha Magaalada Bosaaso ayaa waxa uu sababay khasaare lixaadle kaasi oo gooba badan oo ay fadhiisin ku la haayeen Ciidamada Maamulka Puntland lagala wareegay, waxa kale oo Ciidanka Puntland gacanta lagaga dhigay Baabuur Dagaal.

Laba Baabuur ayaa Gacanta lagaga dhigay ciidanka Puntland ayaa waxay ahaayeen nooca loo adeegsado Dagaalka kuwaasi oo mid ka mid ah uu ku xidhanaan Qori

Dhamaan goobaha Ganacsiga ayaa la xidhay iyada oo aaney jirin wax Bakhaaro ah oo furan,dadka qaar ayaa ka soo barakacay Xaafada Biyo Kulule oo ah Goobta uu Dagaalkaasi ka dhacay, Boqolaal Qoys ayaa arkaysaa oo Madaxa ku sita Alaabtoodii si ay ugu hayaamaan goob Amaan ah ay ku bad baadi karaan.

Baabuurta gacanta lagaga dhigay Maamulka Puntland ayaa haatan waxay yaaliin Goobihii uu dagaalku dhacay,waxana Gubay Shacab Cadhaysan oo aad uga soo horjeeda Maamulka Puntland siyaasadiisa, sida aad sawirka ku arkataan Baabuurkaas ayaa waxa lagu garaacay Dhagaxaan isaga oo dhinaca Dhulka loo dhigay Markii danbe Dab la qabadsiiyay.

Suuqa Bacadla ha ee magaalada Bosaaso ayaa gabi ahaanba xidhan waana suuqa ugu wayn Magaalada Bosaaso,dadka inta badan waxay cabsi xoogan ka qabeen inay haleesho xabad wiif ah.

Kumanaan ruux dad kur u dhaafaya ayaa isa soo dhoobay goobihii uu Dagaalku ka dhacay kuwaasi oo shucuurtooda ay ka muuqatay sida ay uga xun yihiin qaabka ay wax u wadaan ciidamada Puntland oo iyagu had iyo jeer rasaasta dadku kusoo ridayay.

Dadkaasi waxay xidheen wadooyinka dhamaan goobahasi soo gala iyaga oo qubay dhagaxaan waa wayn si ay u joo jiyaan Ciidamada Puntland.

Dhamaan Isu socodka Gaadiidka iyo dad waynaha ayaa waxa ku yimi hakad kuwaasi oo dhamaanba ay wadooyinku ahaayeen kuwa Cidla ah oo aan cidi joogin, Jidka dheer ee aada Ceelka Biyo Kulule  ayaa ahaa mid gabi ahaanba xidhan.

Wararka oo gadaal hataan naga soo gaadhayaa ayaa tibaaxa in Maamulka Puntland uu jeelka dhigay laba Nabadoon oo caan ah kuwaasi oo la sheegay inay isku hayb yihiin Dhalinta Saaka uu Dagaalku dhex maray Ciidamada Puntland.

Labadan Nabadoon ayaa waxa lagu kala magcaabaa  Nabadoon C/ Salaan Yuusuf iyo Shiikh  C/ Laahi Cabdi Cumar, waxana ay hadaan ku jiraan Xabsiga dhexe ee Magaalada Bosaaso.

Xaalada ayaa ah mid Degan laakiin waxa laga cabsi qabaa in Mar labaad uu Dagaal Qarxo marka loo eego isu hub uruursiga labada dhinac.

Xigasho: Laasqoray

webmaster@ceegaag.com