Gudoomiyaha Baarlamaanka oo kulan kula qaatay Magaalada Baydhabo Danjiraha Dowladda Kenya ee Somalia.

                                                       (Baydhabo, January,  08 2008 Ceegaag Online)

Gudoomiyaha baarlamanka ahna kusimaha Madaxweynaha Jamhuuriyadda Soomaaliya  Sheekh Aadan Madoobe ayaa maanta xarunta Madaxtooyada magaalada Baydhabo ku qaabilay wafuud ka socotay Dowlada Kenya kuwaasi oo uu horkacayay Safiirka Kenya ay u soo magacawday Soomaaliya Mr Jemis Mokumbi.

Kulanka qaabilada wafuudani oo sidoo kale uu goob joog ka ahaa Ra’iisal Wasaaraha Soomaaliya Nuur Xasan Xuseen (Nuur Cade) ayaa waxaa Kusimaha Madaxeynaha Sheekh Aadan Madoobe lagu gudoonsiiyay dhambaal tahniyad ah oo uu soo diray Madaxweynaha dalka Kenya Mwai Kibaki taas oo laxiriirtay Sanadka cusub iyo Xiriirka qotada dheer ee ka dhaxeeya dowladaha Kenya iyo Soomaaliya iyo sidii loo sii hormarinlahaa saaxibtinimada labada dal.

Safiirka Kenya u fadhiya Soomaaliya Jemis Mokumbi oo ay safarkiisa ku wehliyeen xubin ka tirsan wasaarada arimaha dibada Kenya iyo xubin kale oo kasocatay Safaarada Kenya ayaa waxa uu madaxda u sharaxay marxaladihii ugu dambeeyay ee dalka Kenya iyo sida dowlada Kenya ay marwalba u garabtaagantahay dowlada Soomaaliya.

Gudoomiyaha baarlamanka ahna siihayaha xilka Madaxweynaha Md Sheekh Aadan Maxamed Nuur (Madoobe) oo hadal ka jeediyay kulanka ayaa sheegay inuu ku faraxsanyahay xiriirka wacan ee marwalba ka dhexeeya dowlada Kenya iyo Soomaaliya.

www.ceegaag.com

webmaster@ceegaag.com