Inka badan 16-qof oo tahriibayaal Soomaali ah ayaa ku geeriyooday biyaha badda ee u dhexeeya dalalka Soomaaliya iyo Yemen.

(Yemen, January 22, 2008 Ceegaag Online)  

Inka badan 16-qof oo tahriibayaal Soomaali ah ayaa ku geeriyooday biyaha badda ee u dhexeeya dalalka Soomaaliya iyo Yemen, kadib markii ay la qalibmatay dooni ay saarnaayeen dadkaasi.

Meydadka 11-qof oo kamid ah dadkaas ayaa la helay kadib markii ay ku soo caariyeen xeebaha dalka Yemen, iyadoo la la' yahay meydadka illaa 5-qof oo ku dhintay badda, waxaa sidoo kale aan weli dhimasho iyo nolol lagu heynin hal qof oo kamid ahaa tahriibyaasha Soomaalida ah ee ay la qalibmatay doonidii ay saarnaayeen.

Doonida qalibmatay ayaa waxaa saarnaa tiro dad ah oo aan weli rasmi ahaan la ogeyn inta ay ahaayeen kuwaas oo doonidu ay kala shiraacatay xeebaha gobolka Bari.

Tahriibayaal isugu jira Soomaali iyo Itoobiyaan ayaa badanaa ku naf waaya biyaha u dhexeeya dalalka Soomaaliya iyo Yemen, iyadoo dadka tahriibayaasha ah ay badankood ka cararayaan xaaladaha dagaal ee ka aloosan dalka Soomaaliya.

Axmed Aadan
Ceegaag.com
Muqdisho Somalia

webmaster@ceegaag.com