Iska hor-imaad xooggan ayaa ka qarxay qeybo ka mid ah degmada Wardhiigley ee magaalada Muqdisho

(Muqdisho, January 22, 2008 Ceegaag Online)  

Iska hor-imaad xooggan ayaa ka qarxay qeybo ka mid ah degmada Wardhiigley ee magaalada Muqdisho, iyadoo iska hor-imaadkaan uu u dhexeeyey ciidamo ka tirsan dowladda Federaalka iyo xoogagga ka horjeeda.

Inta laxaqiijiyey mid kamid ah askarta ciidamada dowladda ayaa ku naf waayey halka ay dhaawacyo ka soo gaareen qaar kamid ah askarta ciidamada dowladda iska hor-imaadka, iyadoo sidoo kale la xaqiijiey geerida qof rayid ah.

Dagaalkaan oo ka dhacay meel ku dhow Xerta Sheekh Aadan Dheere ee degmada Wardhiigley ayaa waxaa la isku adeegsaday hubka nuucyadiisa kala duwan, iyadoo iska hor-imaadkan uu yimid kadib markii ciidamo ka tiran dowladda Federaalka ay isku balaariyeen nawaaxiga Xerta Sheekh Aadan Dheere.

Dhaq-dhaqaaqii ganacsiga iyo isu socodkii dadka iyo gaadiidka ayuu saameyn xooggan ku yeeshay dagaalka, iyadoo qaar kamid ah dadka deggan goobaha ku dhow halka uu iska-hor-imaadku kadhacay ay sheegeen in khasaare dhimasho iyo dhaawac leh la gaarsiiyey ciidamada dowladda ee halkaas isku soo fidiyey.

Ciidamada dowladda ee halkaas soo gaaray ayaa markii dambe dib u laabtay, iyadoo hadda jawiga goobihii uu dagaalku ka qarxay uu yahay mid deggan.

Iska hor-imaadyada u dhexeeya ciidamada dowladda Federaalka iyo xoogagga ka horjeeda ayaa badanaa ka dhaca magaalada Muqdisho.

Axmed Aadan
Xafiiska wararka Muqdisho,  Somalia

webmaster@ceegaag.com