Jandayi Frazer oo ka hadashay Arrimaha Somalia.

                                               (Somalia, January, 09 2008 Ceegaag Online)   

Kaaliyaha xoghayaha arrimaha dibadda ee Mareykanka u qaabilsan Arrimaha Afrika Jandayi Frazer oo ku sugan Magaalada Nairobi ayaa maanta ka hadashay arrimaha Somalia, iyadoo sheegtay in Dowladda Federaalka looga baahan yahay inay tixgelin siiso kooxaha mucaaradka ah.

"Mucaaradka kazoo horjeeda Dolwadda Federaalka waxay xaq u leeyihiin inay fikraddooda soo bandhigaan ayna ka qaybqaataan geeddi socodka nabadda ee Somalia" ayay tiri Frazer oo sheegtay inay soo jeedinayso in mucaaradka iyo Dowladda Federaalka Somalia ay ku wadahadlaan gudaha dalka.

Kaaliyaha Xoghayaha Arrimaha Dibada ee Mareykanka Jandayi Frazer, waxay sidoo kale sheegtay in Dowladda Federaalka Somalia laga doonayo inay ka qayb galiso Xukuumada Kooxaha mucaaradka ee aan xagjirka ahayn si meesha looga saaro dagaalada ka dhaca gudaha Somalia ee ay ku dalbanayan mucaaradka inay qayb ka noqdaan hoggaanka Somalia.

Hadalka Farazer, ayaa ku soo beegmay iyadoo Ra'iisul Wasaraha Somalia Nuur Xasan Xuseen (Nuur Cadde) uu shalay ka dhawaajiyay in xukuumaddiisu ay waddo qorshayaal ay ku doonayso inay wadahadallo kula furto mucaaradkeeda meel walba oo ay joogaan.

Sidoo kale Frazer, waxay ka hadashay nabad ilaaliyeyaasha Afrikaanka ah ee ku sugan Gudaha Wadanka Somalia iyo kuwa lagu wado in hadda la geeyo, waxayna sheegtay in sababta dib u dhigtay in la dhameystiro ciidamada AMISOM ay tahay kharash la'aan haysata wadamada ka qeyb qaadan lahaa Howlaha Nabad ilaalinta ee Somalia.

Jandayi Frazer ayaa waxay dhowr jeer oo ay ka hadashay arrimaha Somalia sheegtay in dhibaatada ugu weyn tahay mucaaradka oo diidan inay la heshiiyaan Dowladda Federaalka, isla markaan kooxaha qaar yihiin xag jir ah.

www.ceegaag.com

webmaster@ceegaag.com