Kooxo dabley ah oo markab Kaluumeysi ku afduubtay xeebaha maamul Goboleedka Puntland.

(Eyl, January 27, 2008 Ceegaag Online)             

Kooxahaan ayaa la xaqiijiyey in ay markabka ku heystaan xeebta degmada Eyl oo ka tirsan Gobolka Nugaal, Guddoomiyaha degmada Eyl C/laahi Siciid ayaa warbaahinta u sheegay in kooxo burcad ah ay afduub ugu heystaan markab xeebaha deegaankaas, isagoo intaa raaciyey in ay arintaas la socodsiiyeen maamulka Puntland oo ay jawaab ka sugayaan.

Wuxuu intaa raaciyey in aanu jirin wax wada hadal ah oo illaa iyo hadda uu la galay kooxaha afduubtay markabka ee xeebaha deegaankaas qafaalka ugu heysta.

Markabka ay kooxaha hubeysan qafaasheen ayaa la sheegay in laga leeyahay dalka Cumaan, isla markaana uu yahay markab kaluumeysi ayna saaran yihiin shaqaalihii markabkaas oo tiradooda lagu sheegay 8-qof oo 5 ay u dhalatay dalka Indonesia halka seddexda kalena ay yihiin Soomaali.

Maamulka Puntlanad illaa iyo hadda ma soo saarin war rasmi ah oo la xiriira afduubka ay kooxaha dableyda ah u geysteen markabka, iyo haddii ay wada hadalo la galayaan kooxaha afduubtay markabka si loo sii daayo.

Dabayaaqadii sanadkii tagay ayey aheyd markii kooxo hubeysan markab ka afduubteen Badweynta Indian Ocean iyadoo muddo kadib lagu guuleystay in gacanta kooxahaas laga sii daayo markabka.

Xafiiska Wararka Ceegaag Online Muqdisho, Somalia

Axmed Aadam Ibraahim

axmedmadoobe@hotmail.com      

 

webmaster@ceegaag.com