Labo qof oo mid uu yahay askari ka tirsan ciidamada dowladda ayaa ku geeriyooday qarax miino oo ka dhacay magaalada Muqdisho.

(Muqdisho, January 26, 2008 Ceegaag Online)  

Qaraxaan oo ahaa miino nuuca dhulka lagu aaso ayaa lala beegsaday kolonyo gaadiid ah oo ay saarnaayeen wafdi ajaanib ah oo marayey shineemo Ceel-gaab, waxaana qaraxa uu haleelay sida la sheegay mid kamid ah gawaari ay saarnaayeen ciidamada dowladda.

Mid kamid ah askarta ciidamada dowladda Federaalka iyo qof rayid ah ayaa halkaasi ku geeriyooday kadib markii uu qaraxu haleelay.

Ilaa 4-qof ayaa ku dhaawacmay qaraxa kuwaas oo dhaawacooda la dhigay isbitalka Madiina ee magaalada Muqdisho, waxaana la sheegay in qaar kamid ah dadka ku dhaawacmay qaraxaas ay xaaladooda caafimaad aad u liidato.

Goobta Qaraxaaasi  ka dhacay ayaa waxaa isku fidiyey ciidamada dowladda oo in muddo ah hakiyey dhaq-dhaqaaqii dadka iyo isu socodka gaadiidka, waxaana warar aan weli la xaqiijin ay sheegayaan in ciidamada dowladda ay dad u qab-qabteen qaraxaas.

Xaaladda goobihii uu qaraxu ka dhacay ayaa hadda deggan, waxaana dib u bilowday dhaq-dhaqaaqii ganacsiga iyo isu socodka dadka.

Ma ahan markii ugu horeysay ee qarax lala beegsado gawaari ay saaran yihiin ciidamada dowladda.

Xafiiska Wararka ee Muqdisho, Somalia

Axmed Aadan Ibraahim

Ceegaag.com

webmaster@ceegaag.com