|
Nigeria oo
Cutubkii Ugu Horeeyey ee Ciidankeeda usoo diraysa Wadanka
Somalia.
(Abujja Nigeria,
January 15,
2008 Ceegaag Online)
Dowladda
Nigeria oo ka mid ah Dowladaha Afrika ee Ciidamada
Nabad-ilaalinta u ballan-qaaday dalka Soomaaliya, ayaa
shaaca ka qaadey inay sida ugu dhaqsiyaha badan ugu soo
dirayso wadanka Soomaaliya ciidamo nabad ilaalin ah oo ka
kooban 500 oo askari kuwaasi oo ka qayb noqon doona
ciidamada Midowga Afrika ee Soomaaliya ku sugan, sida uu
qorshuhu yahay.
Agaasimaha waaxda xiriirka dadweynaha ee ciidamada wadanka
Nigeria Brig.-Gen. Solomon Giwa-Amu,ayaa ku nuuxnuuxsadey in
ciidamdan Nigerian-ka ah ay diyaar u yihiin daqiiqad kasta
in loo daabulo wadanka Soomaaliya, iyagoo ku hawlgalaya
magaca AMISOM ee Ururka Midowga Afrika.
Giwa-Amu, ayaa isagoo ku sugan wadanka Liberia isla markaana
ka mid ah ciidamada Nigeria ee qaybta ka ah ciidamada
Qaramada Midoobey ee dalkaasi ku sugan ayaa maalinimadii
Axada ah wuxuu saxafiyiinta u shaagey in hal batalyan oo ka
mid ah ciidamada Nigeria ay diyaar u yihiin sidii loogu
daabulo wadanka Soomaaliya.
Gen.Giwa Amu wuxuu farta ku fiiqey in 2,400 askari oo ka mid
ah ciidamada Nigeria ay haatan ku sugan yihiin Gobolka
Darfur ee wadanka Suudaan, iyagoo ku socda magaca hawlgalka
UNIMIS ee Midowga Afrika, halka 2000 oo kale ay iyaguna
hawlo nabad ilaalin ah ka wadaan Liberia, iiyagoo hoos taga
hawlgalka nabad ilaalinta Midowga Afrika ee UNMIL.
Brig.-Gen. Solomon Giwa-Amu wuxuu xusey in ciidamada Nigeria
ay gobolka ka wadaan 8 hawlgal oo ay UN-ka kagala qayb
qaadanayaan hawlgalo nabad ilaalin ah oo laga fuliyo Gobolka
gaar ahan wadamada Liberia, Sudan, Burundi, Galbeedka Saxara,
Sierra Leone, Ivery Coust iyo Guinea.
Giwa-Amu ayaa tibaaxay in ciidaamda Nigeria ay u carbisan
yihiin hawlaha nabad ilaalinta, balse ay hawshaasi caalamka
ka kala leedahay wajiyo kala duwan.
"Hawsha nabad ilaalinta waxay askariga ka sameynaysaa in uu
matalayo siyaasada wadanka Nigeria fulinteeda, waxayna taasi
siinaysaa in uu aaminsan yahay in uu badbaadinayo nolol iyo
hantida dadka kale ee aan u dhalan wadankiisa" ayuu
hadalkiisa kusoo afmeeray Brig.-Gen. Solomon Giwa-Amu .
www.ceegaag.com
webmaster@ceegaag.com |
