Qarax ka dhacay Magaalada Kismaayo oo ay ku dhinteen Saraakiil ka tirsanaa Hay’adda MSF Spain.

(Kismaayo, January 28, 2008 Ceegaag Online)

Qarax xooggan oo goor dhaweyd ka dhacay bartamaha magaalada Kismaayo ayaa waxaa ku geeriyooday Saraakiil ka tirsan Hay'adda dhaqaatiirta aan xuduuda laheyn ee MSF Spain.

Qaraxa oo ahaa midka la hago ayaa lala beegsaday gaari ay saarnaayeen saraakiisha ka tirsanaa Hay'adda MSF Spain, iyadoo qaraxaasi ay ku geeriyoodeen illaa 4-qof oo labo kamid ah ay ahaayeen saraakiil ka socotay Hay'adda MSF Spain halka labada kale ay kala ahaayeen qof Kenyati ah iyo darawalkii gaariga oo ahaa Soomaali.

Gabi ahaanba qaraxu waxa uu burburiyey gaariga, iyadoo aan illaa iyo hadda la ogeyn cidda ka dambeysa iyo ujeedada laga lahaa,.Xaaladda magaalada Kismaayo ee xarunta gobolka Jubada Hoose ayaa hadda aad u kacsan, waxaana jira waxyeelo kale oo uu qaraxaasi u geystay dad rayi ah.

ilaa iyo hadda ma jirto cid loo qabqabtay qaraxaasi lagu qaarijiyey saraakiil ka tirsan Hay'adda MSF Spain iyo dad kale, waxaana jawi kacsanaan ah laga dareemayaa magaalada Kismaayo ee xarunta gobolka J/hoose.

Qaraxaan lagu khaarijiiey saraakiil ka tirsan hay'adda dhaqaatiirta aan xuduuda laheyn ayaa ku soo beegmaya xilli xaaladda magaalada Kismaayo ay maalmihii u dambeeyey ay aheyd mid aad u kacsan oo maleeshiyo beeleedyo hubeysan ay Isbaarooyin dhinteen wadada aada Dekada Magaalada Kismaayo.

Xafiiska Wararka Ceegaag Online Muqdisho, Somalia

Axmed Aadam Ibraahim

axmedmadoobe@hotmail.com      

 

webmaster@ceegaag.com