Qeybo kamid ah waddooyinka magaalada Muqdisho ayaa saakay xiran iyadoo gebi ahaanba aaney halk-aas ka jirin isu socodka gaadiidka iyo dadweynaha.

(Muqdisho, January 23, 2008 Ceegaag Online)  

Waddooyinka saakay xiran ayaa waxaa ugu muhiimsan wadada Maka Al-mukarama halkaas oo maalmihii ugu dambeeyey ay siweyn u isticmaalayeen inta badan gaadiidka isaga goosha magaalada Muqdisho gaar ahaan degmooyinka Howl-wadaag, Hodan , Xamarweyne, Waaberi, Wada-jir iyo Dharkeynley.

Ciidamo ka tirsan Dowladda Federaalka ayaa saakay aroortii hore isku gadaamay wadadaas, iyagoo gebi ahaanba diiday isu socodka gaadiidka iyo dadweynaha.

Gaadiidka BL-ka ah ayaa isticmaalaya waddooyin ku yaala xaafadaha gudahooda, waxaana sare u kac uu ku yimid qiimaha lagu raaco gaadiidka dadweynaha.

Si cad looma oga waxa ka dambeeya in ciidamo ka tirsan dowladda federaalka ay xiraan waddooyin muhiim u ah isu socodka gaadiidka BL-ka , waxana jira warar hoose oo sheegayaa in maanta la filayo in wafdi ajanabi ah ay ka soo degaan garoonka caalamiga ah ee magaalada Muqdisho

Wadada Wadnaha iyo tan Warshadaha ayaa weli u xiran ciidamo isugu jira Itoobiyaan iyo ciidamada dowladda Federaalka, iyadoo aaney waddooyinkaas in muddo ah isticmaalin gaadiidka dadweynaha.

Waddooyinka ay xiraan ciidamada dowladda ayaa waxa ay saameyn balaaran ku yeeshaan dadweynaha, iyadoo uu hakad ku yimaado dhaq-dhaqaaqa ganacsiga iyo gaadiidka dadweynaha ee isaga goosha xaafadaha Muqdisho qaarkood.

Axmed Aadan
Ceegaag.com
Xafiiska Wararka Muqdisho, Somalia

webmaster@ceegaag.com