Senator Barack Obama oo ku guuleystay Is reeb-Reebka Codbixinta Gobolka South Carolina.

(South Carolina, January 27, 2008 Ceegaag Online)

Senator Barack Hussein Obama oo kamid ah Musharixiinta xisbiga Dimuqraadiga ee loolanka ugu jira is reeb reebka  tartanka Madaxtinimada  Mareykanka ayaa maanta ku guuleystay Doorasho ka dhacday Gobolka South Carolina.

Barack Hussein Obama ayaa waxaa dhanka xisbiga Dimuqraadiga tartan kula jiray Senator Hillary Clinton oo ah haweeneyda u dhaxday Madaxweynihii hore ee Mareykanka Bill Clinton, iyo Siyaasiga John Edwards.

Doorashadan oo dhacday  ayuu Senator Barack Obama helay 55% ee codadkii la dhiibtay, Hillary-na ay heshay 27% halka John Edwards helay 18%.

Gobolka South Carolina ayaa ah gobol ay aad ugu badan yihiin dadka Madow ama (African-Americans) ee asal ahaan iyagu kasoo jeeda Qaarada Africa.

Senator Barack Obama ayaa Aabihii asal ahaan kasoo jeeda gobolka Nyanza ee galbeedka dalka Kenya, halka hooyadii tahay caddaan Mareykan ah kana soo jeeda Gobolka Kansas, Obama waa qareen (Lawyer) bartay cilmiga sharciga, wuxuuna ku biiray aqalka Senate-ka sanadkii 2004.

Guusha Obama ee gobolka South Carolina ayey dad badan ku tilmaameen mid yididiilo gelineysa ololaha uu ugu jiro hanashada jagada Madaxweynenimo ee dalka Mareykanka

Barack Hussein Obama ayaa ah shaqsi lagu tilmaamay inuu leeyahay awood hoggaamineed, isla markaana khudbadihiisu qof kastoo dhegaysata, gaar ahaanna da’yarta u dhexayso 18-40 jirka, ayaa ku masalay inuu la mid yahay John F.Kennedy oo ahaa Madaxweynihii 35 ee Dalka Mareykanka iyo Martin Luther King Jr oo isna ahaa Halyeey udoodijiray Xuquuqda Dadyowga Madow ee ku dhaqan Dalka Mareykanka.

www.ceegaag.com

 

webmaster@ceegaag.com