Shir ka dhacey Magaalada Cape town oo looga had-layay dhibaatada haysata Umadda Soomaaliyeed ee ku dhaqan wadankan Koonfur Africa‏.

(Johannesburg, January 11, 2008 Ceegaag Online)

Shir ballaaran ayaa xaley waxa uu ka dhacey Hoolka Shirarka ee xaafadda Balvelle ee magalada Cape town ee dalka koonfur Africa, shirkaasi ayaa waxaa ka soo qeyb galey Soomaali isugu jirta Culumaau’diin, Aqoonyahanno, iyo Ganacsato, shirkaasi oo loogu magac daray shirka wada tashiga Soomaalida western Cape, ayaa waxaa lagu falanqaynayay sida soomaalida ku dhaqan Gobolka western cape amaba guud ahaan wadanka koonfur Africa, loogu yeeli lahaa guddi mideysan.

Shirkaasi ayaa waxaa qudbado meel taabanaya ka soo jeediyey qaar ka tirsan Culumaau’diinka iyo ururka dhalinyarada Jaalliyada Soomaaliyeed ee gobolka western cape, mid ka mid ah culumada ka soo qeyb gashey shirka oo lagu magacaabo Sheekh Cabdi Rashiid Caafi ayaa sheegay inay lagama maarmaan tahey sidii loo heli lahaa guddi isku xira dowladda koonfur Africa iyo Soomaalida ku dhaqan wadanka.

Sidoo kale Sh. Cabdirashid ayaa waxaa carabka ku dhuftay in loo baahanyahay in la helo guddi u ololeeya sidii loogu fududeyn lahaa soomalida sharci lagu jooga wadanka maadama buu yiri soomaalida ay ku adagtahey luuqada English-ka ee looga hadlo guud ahaan wadankan.

Waxaa kaloo halkaasi qudbado ka soo jeediyay qaar ka tirsan ganacsatada gobolka western cape oo iyagana ka hadlay in xal loo helo soomaalida sida Arxan darada loogu xasuuqo wadanka koonfur Africa, waa markii ugu horeysay shir caynkani ah lagu qabto magalada cape town iyadoo guud ahaanba ay soomaalida ku nool wadanka koonfur Africa la wado qorshe ah sidii loo wado mideyn lahaa dhamaan Jaalliyada ku dhaqan wadanka koonfur Africa,

Bishii la soo dhaafay ayay ahayd markii soomaalida ku dhaqan magalada Johannesburg ay doorteen Gudoomiye iyo ku xigeen iyo xubno kale kuwaasoo dhamaan balan qaaday inay wax ka qabanayaan dhibaatooyinka haysta Soomaalida ku nool wadanka koonfur Africa, sidoo kale Soomaalida ku dhaqan gobolka north west ayaa iyaguna ku gulaystay in ay ka dhisaan Jaalliyad magalada Rustenburg. iyagoo halkaas ku magacaabay Gudoomiye iyo ku xigeeno,

Hassan yeey,

Johannesburg, South Africa

yeey18@hotmail.com

webmaster@ceegaag.com