Wadooyin Badan oo kuyaala Magaalada Muqdisho oo saaka dib u furmay kadib markii ay ka baxeen Ciidamada DF iyo Kuwa Itoobiya.

(Muqdisho, January 30, 2008 Ceegaag Online)

Waddooyin badan oo ku yaala magaalada Muqdisho ayaa saakay dib u furmay kadib markii ay halkaas isaga huleen ciidamo isugu jira Soomaali iyo Itoobiyaan oo in muddo ah ku sugnaa waddooyinkaas.

Waddooyinka muhiimka ah ee saakay dib u furmay oo ay ka howl bilaabeen gaadiidka dadweynaha waxaa kamid ah wadada Wadnaha, wadada 30-ka iyo qeybo kamid ah wadada Warshadaha.

Muddo 2-bil ah kadib ayaa saakay dadweyne aad u badan iyo gaadiid lagu arkay wadada wadooyinkaas halkaas oo ay mudaba deganaayeen Ciidamada Dowladda Federaalka iyo kuwa Itoobiya.

Gaadiidka isaga goosha KM4 ilaa Baar Ubax ayaa si caadi ah u shaqeynayey, iyadoo gaadiidka ka soo baxaya KM4 ay sidoo kale soo aadayaan isgoysyada Bakaaraha iyo Howl-wadaag iyagoo soo maraya hareeraha Tarabuunka.

Ma jiraan wax ciidamo ah oo saakay waddooyinkaas jooga, illaa iyo haddana ma jiro mas'uul ka tirsan Dowladda Federaalka oo ka hadlay sababaha ay ciidamada Dowladdu ugu guureen waddooyinkaas.

Dadweynaha ku dhaqan Magaalada Muqdisho ayaa si weyn u soo dhaweeyey muddo 2-bil ah kadib in ay dib u furmaan waddooyin muhiim u ahaa isu socodka Gaadiidka iyo dadweynaha.

Xafiiska Wararka Ceegaag.com Muqdisho, Somalia

Axmed Aadam Ibraahim

axmedmadoobe@hotmail.com

webmaster@ceegaag.com