Wasaaradda Arimaha gudaha Dowladda KMG oo ku howlan maamul u sameynta Gobolka Bay.

(Baydhabo, January 31, 2008 Ceegaag Online)

Wasaaradda arrimaha gudaha dowladda federaalka ayaa dadaal ugu jirta sidii ay doorashooyin uga qeyb laheyd gobolka Bay oo ay hareeyeeyn khilaafyo dhinac maamulka ah.

Wasiirka arrimaha gudaha dowladda federaalka Mudane Muuse Nuur Amiin ayaa wada dadaal uu doorashooyin kaga hirgalinayo gobolka Bay, iyadoo ay magaalada Beydhabo ka socoto qabanqaabo arintaas la xiriirta.

Muranka ayaa sii xoogeystay markii Xaaji Maxamuud Maxamed Barbaar oo hore u ahaa guddomiyaha gobolka Bay uu sheegtay in uu weli yahay guddoomiyaha rasmiga ah ee gobolka Bay, waxaana sheegashada mas'uulkaas ay khilaaf siyaasadeed oo xooggan ka dhex abuurtay madaxda gobolka Bay.

Wasaaradda arrimaha gudaha dowladda federaalka ayaa ku howlan in ay xaliso khilaafa, iyadoo qorse mamul loogu sameynayo gobolka Bayna uu ka socdo magaalada Baydhabo ee xarunta gobolka Bay.

Shirar arintaas la xiriira ayaa ka socda magaalada Beydhabo, waxaana wasiirka arrimaha gudaha uu kulamo kala duwan la qaatay waxgaradka iyo odayaasha gobolka Bay si maamul loo dhan yahay looga dhiso gobolkaas.

Khilaafka dhinaca mamulka ah ayaa ku soo laab-laabtay magaalada Beydhabo, waxaana taasi ay keentay in xilkii guddoomiyaha gobolkaas ay si ku meel gaar ah dowladda ugu dhiibto taliyaha ciidanka qeybta gobolka.
 

Xafiiska Wararka Ceegaag.com Muqdisho, Somalia

Axmed Aadam Ibraahim

axmedmadoobe@hotmail.com

webmaster@ceegaag.com