Xoghayaha Guud ee Qaramada Midoobay oo ugu baaqday DF inay ilaaliso Ammaan-ka shaqaalaha Hay'adaha Samafalka.

(New York, January 29, 2008 Ceegaag Online)

Xoghaya guud ee Qaramada Midoobay Ban Ki Moon ayaa cambaareeyey falkii shalay lagu khaarijiyey dhaqaatiir ka tirsanaa Hay'adda MSF Spain  kadib markii qarax miino lala beegsaday gaari ay saarnaayeen iyagoo maraya gudaha magaalada Kismaayo.

Ban Ki Moon waxa uu sheegay in ay aad uga xun yahay qaraxaas lagu khaarijiyey dhaqaatiir ka tirsanaa MSF Spain iyo saxafi Soomaali ah oo lagu magacaabi jiray allaha u naxariistee Xasan Kaafi Xareed.
"Waa in dowladda KMG ay damaanad qaadaa amaanka saraakiisha hay'adaha Qaramada Midoobay ee ka howlgalaya gudaha Soomaaliya, waana waajib saaran in amaanka madaxda hay'adaha Qaramada Midoobay ay si buuxda u ilaaliso dowladda federaalka" ayuu yiri ban Ki Moon

Wuxuu wel-wel xooggan ka muujiyey xaaladda ka sii dareysa ee dalka Soomaaliya, isagoo xusay in ay tahay in si weyn amaankooda loo damaanad qaado madaxda hay'adaha caafimaadka iyo kuwa samafalka ee ka howlgalaya gudaha Somalia.

Hadalka xoghaya Qaramada Midoobay ayaa imaanaya maalin uun kadib markii qarax miino lagu khaarijiyey dhaqaatiir ka tirsanaa hay'adda dhaqaatiirta aa xuduuda laheyn ee MSF Spain

Dhinaca kale Shaqaalaha Hay'adaha Gargaarka ayaa waxay bilaabeen inay isaga baxaan Magaalada Kismaayo, iyadoo shalay gelinkii dambena Diyaarad ka qaaday meydkii Shaqaalaha MSF Spain una qaaday dalka Kenya

Dhinaca kalena Hay'adaha IFJ iyo MUSOJ oo u dooda xaquuqda saxafiyiinta ayaa cambaareeyey falkii lagu dilay weriye Xasan Kaafi Xareed oo shalay ku naf waayey qarax miino oo ka dhacay bartamaha magaalada Kismaayo ee xarunta gobolka Jubadda Hoose.

Xafiiska Wararka Ceegaag Online Muqdisho, Somalia

Axmed Aadam Ibraahim

axmedmadoobe@hotmail.com

webmaster@ceegaag.com