Ra'iisal Wasaare ku xigeenka ayaa maanta xubnaha Barlamaanka hortooda ka warbixiyay natiijadii shirkii Jabuuti.

(Baydhabo, July 16,  2008 Ceegaag Online)

Ra'isal wasaare ku xigeenka Xukuumada KMG ah ahna Wasiirka Wasaarada Warfaafinta dhalinyarada iyo ciyaaraha Axmed C/salaan ayaa maanta hortagay xildhibaanada Baarlamaanka KMG ah si uu uga warbixiyo natiijadii shirkii dibu heshiisiinta ee lagu qabtay jamuuhuuriyada Jabouti kaasoo u hogaminayay wafdigii dhinaca dowlada uga qeybgalay.

Axmed C/salaan ayaa sheegay in shirkii Jabuuti uu ahaa mid bilaw ah oo fure u ah shirar badan oo dibu heshiisiineed, waxuuna xildhibaanada xasuusiyay in gudiga u xilsaaran dibu heshiisiinta ay tiradoodu tahay 21 xubnood oo 12 ka mid ah ay yihiin xildhibaano sidasi daradeedna xildhibaanada looga baahan yahay inay taageeraan qorshaha nabada ee la wado.

Isagoo ka hadlayay dhinaca ciidamo keenida ayuu ugu baaqay beesha calamka in ay soo dadajiyaan ciidamadii badali lahaa kuwa Itoobiya, isago cadeeyay inanay jirin in hadii ciidamo aan la keenin inaysan macquul ahayn inay baxan kuwa hada jooga, waxuu Axmed C/salaan shegay in wadahadalku sii socon doono.

Wasiirka ayaa dhibaatada dalka ka jirta dusha uga tuuray inay ka masuul yihiin dadka Soomaalida ah ee aysan wax shaqo ah ku lahayn shisheye, isagoo muujiyay in hadii Soomaalidu heshiiso aan loo diidi karin waxa ay rabto, ugu danbeyntii ayuu sheegay in dulqaad la muujiyo hadii ay wax qaldamaan la isku dayo in la saxo.

Mudooyinkan dambe aya waxaa socday olole lagu doonayo in lagula xisaabtamo xukuumada Ra'isal wasare Nuur Cadde taasoo lagu dhaliilsanaa sida ay wax u wadi gaar ahaan arimaha dibu heshiisiinta iyo dhinaca amaanka iyo waliba dhaqalo la'aan soo wajahday xubnaha Barlamaanka

www.ceegaag.com

webmaster@ceegaag.com