Ra’iisal Wasaare Nuur Cadde oo Xilkii ka qaaday Gudoomiyihii Gobolka Banaadir Max’ed Dheere.

(Muqdisho, July 29,  2008 Ceegaag Online)

Kulan ay maanta isugu yimaadeen Golaha Xukuumada Federaalka Soomaaliya oo uu shir gudoominayay Ra'iisul Wasaaraha Soomaaliya Mudane Nuur Xasan Xuseen (Nuur Cade) ayaa xilkii ka xayuubiyey Maxamed Cumar Xabeeb (Maxamed Dheere) oo isku hayey jagada Gudoomiyaha Gobolka Banaadir iyo Duqa magaalada Muqdisho.

Xilka qaadistani ayaa waxaa cod aqlibiyad ah ku aqbalay golaha Wasiirada Dowladda Federaalka waxaana kasoo qeyb galay kulankaasi 11 Wasiir iyadoo aysan soo xaadirin afar Wasiir halka sedex aanan wali la magacaabin Wasiirka Arrimaha Dibada ee Dowladda Federaalka Cali Axmed jaamac Jangeli uu ku maqan yahay Dalka Iran oo uga qeybgalay shir halkaas ka dhacay,waxaana codkii la qaaday 7 ka mid ah ay u codeeyeen in xilka laga qaado Gudoomiyaha Gobolka Banaadir Maxamed Dheere halka ay laba diideen labana ka aamuseen.

Ra'iisul Wasaare Nuur Cade ayaa warar hoose ay sheegayaan inuu xilkaasi u dhiibi doono Maxamuud Cumar Tootow oo ay isku heeb yihiin Ra'iisul Wasaare Kuxigeenka ahna Wasiirka Warfaafinta, dhalinyarada iyo Sportiga Axmed Cabdisalaan.

Ilaa hada wax war ah kama soo bixin Gudoomiyihii Xilka laga Xayuubiyay ee Gobolka Banaadir Maxamed Dheere iyadoo maanta uu gaaray magaalada Muqdisho Madaxweynaha Dowladda Federaalka Soomaaliya C/llaahi Yuusuf Axmed.

www.ceegaag.com

webmaster@ceegaag.com