Ra’iisul Wasaaraha Soomaaliya oo ugu baaqay Ururka Al-shabaab inay ku soo biiraan wada hadallada Nabadda.

(Addis Ababa, July 08,  2008 Ceegaag Online)

Ra’iisul wasaaraha xukuumadda Federalka Soomaaliya Nuur Xasan Xuseen (Nuur Cadde) oo booqasho saddex maalmood ah ku tagay magaalada Addis-ababa ee dalka Itoobiya ayaa ugu baaqay ururka Al-shabaab inay ka faa’iideystaan fursadda nabadda oo ay garwadeenka ka tahay Qaramada Midoobay isla markaana ay ku soo biiraan wada hadallada nabadda.

Ra’iisul wasaare Nuur Cadde wuxuu ku tilmaamay heshiiska dalka Jabuuti fursad muhiim ah oo daaqad u fureysa inay ku soo biiraan dhammaan ururada ka soo horjeeda dawladda federalka, wuxuuna sheegay inay aad u daneynayaan in ururka Al-shabaab uu qeyb ka noqdo wada hadallada nabadda si uu u dhameystirmo heshiiska dalka Jabuuti ay ku saxiixdeen dawladda federalka iyo isbahaysiga Asmara.

Nuur Cadde wuxuu ku nuux-nuuxsaday in irdaha wada hadallada ay u furan yihiin cid kasta oo nabad dooneysa oo jecel in shacabka Soomaaliyeed uu ka baxo dhibaatada 18 sano jirsatay, wuxuuna intaa ku daray in isbahaysiga Asmara garabkooda ku sugan Asmara ee aan taageerin heshiiska uu ka rajaynayo inay iyagana wax la qeybsan doonaan saaxiibadooda heshiiska saxiixay, isagoo ku celceliyay in ururka Al-shabaab ay yihiin qeyb muhiim ah oo ka maqan wada hadallada nabadda, la’aantoodna aanay suurto gal ahayn in heshiisku dhameystirmo.

Ra’iisul wasaare Nuur Xasan Xuseen (Nuur Cadde) wuxuu dhinaca kale cambaareeyay dilkii magaalada Muqdisho loogu geytay madaxii hay’adda UNDP xafiiskeeda Muqdisho Cismaan Cali Axmed, wuxuuna sheegay inay taasi caqabad iyo dhibaato ku keeni karto wada hadallada nabadda oo ay ku hawlan tahay Qaramada Midoobay.

www.ceegaag.com  

webmaster@ceegaag.com