Baarlamaanka Somalia oo gudo galaya ka doodidda qodob la xiriira la dagaallanka Argagaxisada iyo Amniga.

(Baydhabo, July 06,  2008 Ceegaag Online)

Golaha Baarlamaanka Federaalka  oo fadhigiisu yahay magaalada Baydhabo ee gobolka Bay ayaa lagu wadaa inay maalmaha soo socda gudo galaan ka doodidda qodob la xiriira la dagaalalanka Argagaxisada iyo Amniga kaas oo uu horay Madaxweyne C/llaahi Yuusuf dib ugu celiyay Barlamaanka si ay uga doodaan una ansixiyaan.

Guddoomiyaha Guddiga Warbaahinta ee Barlamaanka Soomaaliya Soomaaliya Mudane Cawad Axmed Xasharo aya sheegay in Madaxwayne C/llaahi Yuusuf uu muddo dhowr bilood ka hor dib ugu soo celiyay Barlamaanka qodobkan la xiriira la dagaallanka Argagaxisada iyo sida loola dhaqmayo marka la qabto, wuxuuna intaa ku daray in Barlamaanku uu ka doodayo qodobkaasi oo lagu soo kordhiyay habab casri ah oo loola macaamilayo shaqsiyaadka lagu xiriiriyay falalka Argagaxisada.

“Ajendooyinka Barlamaanka miiska u saaran oo inay ka doodaan loo baahan yahay ayuu ka mid yahay qodobkaasi la xiriira la dagaallanka argagaxisada iyo sida loola macaamilayo, waana qodob xasaasi ah oo laga yaabo inay xubnaha Barlamaanka ay ku kala qeybsamaan’ ayuu yiri Xildhibaan Cawad Axmed Xasharo oo intaa ku daray in erayga Argagaxiso ay fikrado kala duwan ka qabaan Shacabka Soomaaliyeed.

Qodobka la dagaallanka Argagaxisada iyo sida loola macaamilayo shaqsiyaadka la soo qabto oo lala xiriiriyo argagaxisanimada waxa ay dadka Soomaaliyeed u fasirteen inuu yahay mid lagu doonayo in lagu xalaaleysto dhiigga Muwaadiniinta Soomaaliyeed ee ka damqaday xasuuqa dadkooda iyo ku xadgudubka diintooda, waana eray ay Reer galbeedku adeegsadaan oo ay kaga soo horjeedaan Muslimiinta.

www.ceegaag.com

webmaster@ceegaag.com