Ciidamo Soomaali ah oo Tababar ku soo qaatay dalka Itoobiya ayaa ku soo wajahan Gobolada Bay iyo Banaadir.

(Somalia, July 14,  2008 Ceegaag Online)

Ku dhawaad 70 Gaadiidka qaada Ciidamada ayaa ka soo gudbay Xadka Gobolada Gedo iyo Bakool ay la wadaagan dalka Itoobiya iyagoo ku soo wajahan Caasimadda Soomaaliya ee Muqdisho iyo Magaalada Baydhabo ee xarunta Gobolka Bay sida ay sheegayan warar laga helay Wasaaradda gaashandhigga Soomaaliya.

Ciidamadan oo muddo ku dhaw sanad tababaro ku soo qaatay Gudaha dalka Itoobiya ayaa waxay ka qeyb qaadan doonaan nabad kusoo dabaalida Dalka Somalia.

Dowladda Federaalka Soomaaliya ayaa waxa culeyso uga imaanaya kooxaha ka horjeeda siyaasadeeda ee qaska ka wada Gobolada Koonfureed ee dalka Somalia, iyadoo todobaadyadii aynu soo dhaafney ay gacanta Dowladda ay ka baxeen Degmooyin ay ka mid yihiin Hiiraan iyo Shabeellaha Dhexe, sidaas darted warar ayaa sheegaya in Ciidamadan laga yaabo in lagu kala qeybiyo Goboladaas.

Ma cadda tababarka Ciidamadan qabaan inuu yahay mid awoodi kara inay iska difaacan awooda kooxaha Dowladda ka horjeeda iyo in kale iyadoo Kooxaha, Soomaalida ee isku baheystay diidmada Dowladda Federaalka  iyo joogitaanka Ciidamada Itoobiya ee Soomaaliya ay yihiin kuwo si fiican u tababaran, iyagoo awood u leh inay bartimaameed ka dhigtaan Ciidamada kala duwan ee ku sugan Soomaaliya.

www.ceegaag.com

webmaster@ceegaag.com