Jendayi Frazer oo sheegtay in Dowladda mareykanka ay qeyb Lixaad leh ka ciyaareyso Ciidamo geynta Dalka Somalia.

(Qaahira, July 01,  2008 Ceegaag Online)

Dowladda Mareykanka ayaa sheegtay inay gacan weyn ka geysaneyso sidii dalka Soomaaliya loo geyn lahaa ciidamo nabad ilaalineed oo qeyb ka qaata nabad ku soo celinta dalka Soomaaliya oo muddo badan burbur ku jiray.

Iyadoo ka qeyb galeysa shir sanadeedka ururka midowga afrika ee ka socda dalka Masar ayey Jendayi Frazer oo ah kaaliyaha xoghaya arrimaha dibadda mareykanka ugu qeybsan arrimaha Africa in dowladda mareykanku ay gacan weyn ka geysan doonto sidii loo daabuli lahaa ciidamada ka socda Nigeria ee la geynayo Soomaaliya.

Waxay sheegtay Mrs. Jendayi Frazer in dowladda mareykanka ay qeyb lixaad leh ka ciyaareyso ciidamo geynta dalka Soomaaliya, iyadoo intaas ku dartay in mareykanka uun aanu bixin doonin dhaqaalaha ku baxaya ciidama geynta dalka Soomaaliya, hase ahaatee ay jiraan dalal kale oo qeyb ka qaadan doona taageerada dhaqaale ee ciidamo lagu geynayo dalka Soomaaliya.

"Iminka waxaa diyaar ah qeyb kale oo ciidamo ka socda dalka Brundi iyadoo tababaran, waxayna u diyaar yihin inay qeyb ka qaataan amaanka dalka Soomaaliya" ayey tiri Mrs. Jendayi Frazer.

Waxay intaas raacisay in mareykanku ka welwel qabo in kooxo argagixiso ah ay ku dhuumaaleysanayaan dalka geeska afrikaku yaala ee Soomaaliya, islamarkaana ay dowladda mareykanka dadaal badan ku bixin doonto la dagaalanka wax ay ugu yeertay kooxo xagjirayaal ah.

Dalka Soomaaliya ayaa iminka waxaa jooga ciidamo tiro yar oo ka socda dalalka Ugandha iyo Burundi, waxaana sidoo kale si aan sharci aheyn dalka u jooga ciidamo Ethiopian ah oo dalka Soomaaliya gudaha u soo galay sanad iyo badh ka hor.

Xafiiska Wararka Ceegaag.com Muqdisho, Somalia

Axmed Aadan Ibraahim

axmedmadoobe@hotmail.com

webmaster@ceegaag.com