Subxaanoow waa mahadaa, 26 June oo si aada laaga soo dhaweeyay Gobolada New England ee wadankan Maraykanka.

(Boston, June 26,  2008 Ceegaag Online)

Jaaliyada Soomaaliyeed ee ku dhaqan New England ayaa u dabaaldagay munaasabada 26 June oo ah  maalintii ugu horeesay Calan matalaya dadka ku hadla Afsoomaaliga laga taagay Geeska afrika, ama calan Soomaaliyeed laga taagay Ciida Soomaaliya.

Maalintan oo ah maalin ay dadka Soomaaliyeed ku xasuustaan markii laga dajiyay calankii Ingiriiska Gobolada waqooyi ee Soomaaliya ayaa iyadu haatan noqotay mid ay u dabaaldagaan dadwaynaha kasoo jeeda gobolada SSC oo ah kuwa iyagu dhiiga ugu badnaa u daadiyay Xoraynta Soomaaliya.

Munaasabadan oo aanba lagu xusin Caasimada Gobolada waqooyi ee Hargaysa iyo tan Gobolka togdheer ee Burco,  ayaa argagaxa aad u balaadhan galisay dadyawga kasoo jeeda SSC iyadoo haatan uu maamulka Gobolada Togdheer iyo Waqooyi galbeed la wareegay maamulka Gobolka Sool ee Caasimada SSC.

Halgankan xoraynta Soomaaliya siiba tan Gobolada Waqooyi oo lakala badsaday balse guushiisii isku si loo wada maalay, ayaa maanta u muuqata in ay reer SSC ku xusuusanayaan*- Abayaashood iyo Awoowayaa-shoodii ku Shihiiday ilaalinta Diinta iyo Ciida Soomaaliyeed siiba tan Gobolada Waqooyi ee Dalka.

Waxaa wax la layaabo ah sababta maalin taariikheedkan looga xusi waayay Burco iyo Hargaysa oo Dhiig badan u daadiyay gaadhida  guushii maalintan ee 26 June 1960 kii.

Shacabkii aadka u tirada badnaa ee kasoo qaybgalay Xafladan ayaa iyaga oo aad u faraxsan ka munaaqa-shooday xaalada dalkii hooyo iyo sidii wax laaga qaban lahaa dhibaatooyinka ka jira sida ugu dhaqsaha badan.

Daawo Sawirada Xaflada

Waxaan idiinkaga taganaa Alle ha u naxariistee Halgamaa Cabdulaahi Suldaan Timacade ee weedhiisa aynu cinwaanka maqaalkanku furanay.

Anigoo sebi uun ahoo                   Sita leeb iyo qaansoo
Siigaduun isku aasoo                   Sabo reer ka fogaanoon
Laygu aaminin soofkiyo               Saaca maanta aan joogno
Gabaygu waygu sugnaayee         Haddii aan Sarsarriigo
Ama aan surmaseejo                  Amaba aan sixi waayo
Ama aan ka salguuro                  Amaba laygu saluugo
Soomaalida i maqlaysaay           I su'aala hadhow

                   

Ilaahaan waxba seegine             Subaciisa Quraankiyo
Sabbaxooyin ku sheegayow        Saciira iyo naciima
Rabbiigii kala seerayow`            Markay suurtu dhawaaqdo e
La soo saaro makhluuqa e          Shaqiga iyo saciidka
Maalintaad kala soocdo              Dembigaannu samaynay
                            Rabbigayow naga saamax

                 

Subciyay oo ka dukeeyaye             Ka siddeetan sebaaney
Calankaannu sugaynaye                 Sahankiisa ahaynow
Seermaweydo hillaacdayow            Sagal maanta darroorayoo
Siigadii naga maydhayow               Saq dhexaannu ahayne
Kii soo saaray cadceeddow              Samada kii u ekaaye
xiddigaa mid la siiyayow                 Saaxirkii kala guurrayeaha
Sarreeyow ma-nusqaamow             An siduu yahay eegno e
                             Kaana siib Kanna saar

                   


Saahidiinta lslaamka e             Subcisaa Jimcayaashiyo
Sibyaanta iyo haweenku          Calankay Saadinayeenow
Cidina kaanay na Siine             Saatir noogu yaboohayow
Saaxirkii kala guurraye            Sarreeyow ma-nusqaamow
Aan siduu yahay eegno e          Kaana siib kanna saar

               

Sallaankii istiqaalkow                Sedadu kay ku xidhnaydow
Sayruukhii Afrikaadow               Saaxirkii kala guurraye
Sarreeyow ma-nusqaamow       An siduu yahay eegno e
Kaana siib kanna saar

                

San-ku-neefle dhammaantii        Khalqiga kii u sinnaayeen
Mid saaxiib la ahayne                  Sangalkii iska diidayow
Saaxirkii kala guurraye               Sarreeyow ma-nusqaamow
Aan siduu yahay eegno e             Kaana siib kanna saar

              

Soomaloo iscunaysa oo               Saqda qaylo dhawaaqdiyo
Sulub laysu cabbaystiyo              Hadba soof la xabbaadhiyo
Saraayaa dami weyde                 Kii laydhiisu na saaqdayow
Kii sadqeeyey qabaa'ile               Isu saaray gacmaa ee
Saf walaala ka yeelayow             Saaxirkii kala guurraye
Sarreeyow ma-nusqaamow         An siduu yahay eegno e
                              Kaana siib kanna saar

                 

In sidayda tihiin iyo                   In kalaanan saxaynine
Soomaloo calan taagta              Saakay noogu horraysa oo
Saddex wiig iyo maalmo           Haddaan Soor cuni waayo
Safrad laygama yaaboo            Sarina mayso naftayda e
Saaxirkii kala guurraye             Sarreeyow ma-nusqaamow
An siduu yahay eegno e             Kaana siib kanna saar

                  

Nimankii na Siraayaye                 Waaxwaax noo kala saaftaye
Solanaayey cadkeenna e              Innagoo dhexda suunku
Sabarkeenna qarqooray               Kii sedkeenna Cunaayaye
Sarartiisa ka muuqdaye               Surwaalkii ka yaraadaye
Daaro loo sibidheeyiyo                 Sariiraa lagu seexdiyo
Kabadh suuf laga buuxshiyo         Mid baabuurka safeeyiyo
Aayad saarta carruuurtiyo            Sagaal boy iyo kuug iyo
Weliba seeksa lahaa                     Kii saabaanka u laabayow
Saaxirkii kala gaurraye                Sarreeyow ma-nusqaamow
An siduu yahay eegno e                Kaana siib kanna saar

                 

Sawjarkaa hubka qaataye               Intuu soodhka ku taagey
U diyaara salaantiyo                       Saraakiisha amraysaay
Sifihii isticmaarka                           Ka siyaadiya maanta oo
Sibilkiinnan ag joogow                    Sibirtiisa istaaga oo
Nin walbaan sigib beeloo                 Sarow taaga gacmaa oo
Sacabkaysku garaaca oo                 Nin walbow saddex goor
                         Subxaanow waa mahaddaa dheh

Subxaanow waa mahadaa
Subxaanow waa mahadaa
Subxaanow waa mahadaa!

webmaster@ceegaag.com