5 qof ayaa ku geeriyootay bam gacmeed xalay lagu tuuray shineemo ku taala magaalada Baydhabo.

(Baydhabo, June 23,  2008 Ceegaag Online)

Wararka ayaa sheegaya in dadka dhintay ay ahaayeen dhalinyaro la sheegay in ay ku shaahayeen goob ku dhow shineemada iyo qaar kamid ah dadkii daawanayey shineemada sida ay sheegayaan wararka laga helayo magaalada Beydhabo ee xarunta gobolka Bay.

"Qaraxa ayaa ahaa bambaano nooca gacanta laga tuuro, waxaana kooxo aan la aqoon ay ku tuureen shineemo ay dad ka daawanayeen aflaan, khasaaraha ka dhashay wuu sii kordhayaa" ayuu yiri mid kamid ah saxafiyiinta ku sugan magaalada Beydhabo oo aan xiriir la sameynay.

Isbitaalka guud ee magaalada Beydhabo ayaa la dhigay dadkii ku waxyeeloobay qaraxa bam ee shineemada lagu weeraray, waxaana howlwadeena isbitaalkaas ay sheegeen in qaar kamid ah dadkii dhaawac ahaanta loo keenay isbitaalka ay xilli dambe ku geeriyoodeen isbitaalka.

Ehelada dadka geeriyooday iyo kuwa dhaawacmaya ayaa walaac ka muujiyey qaraxa lagu weeraray gobta aflaanta lagu daawanayey, iyadoo dadka qaraxaas ku waxyeeloobay ay u badnaayeen dad dibadda ka joogay goobta oo ku shaahayey meel biibito ah.

Habeen hore uun bey aheyd markii qarax bam lagu tuuray shineemo ku taala degmada Xamar Jajab halkaas oo qofna uu ku geeriyooday afar kalena ay ku dhaawacmeen.

Xafiiska Wararka Ceegaag.com Muqdisho, Somalia

Axmed Aadan Ibraahim

axmedmadoobe@hotmail.com

webmaster@ceegaag.com